Tiranë, 6 Maj 2011 NOA - Ndërsa na ndan një ditë nga heshtja elektorale dhe një tjetër nga e diela elektorale, kryeministri Sali Berisha ka vendosur të rrëfehet edhe në pika delikate sidomos në kohë fushate, ato të pranimit të gabimeve konkrete dhe vlerësimit të punës së kundërshtarit.
Në një intervistë të enjten për “Opinion” në tv Klan, z.Berisha tha se “ka pasur një gabim në fushatën e vitit 2007”, duke shtuar: “Më doli jashtë kontrolli emetimi i një spoti që nuk duhej emetuar dhe për të cilin unë mbaj përgjegjësi. Ai që nxirrte zotin Rama në plazh. Ai nuk duhej bërë. Po të kisha qenë vetë, nuk do e kisha lëshuar atë spot”.
Nga ana tjetër, z.Berisha ka pranuar dhe se Edi Rama ka pasur arritje gjatë këtyre viteve si kryebashkiak: “Tirana natyrisht është larg nga Tirana e 10 viteve më parë. Ka zhvillime pozitive, por ka zhvillime nga më dramatiket. Tirana këto 10 vite, ka njohur zgjerimin e 3 akseve kryesore, një bojatisje të pallateve, fenomen ky që është përshtatur në disa kryeqytete të botës”, ka deklaruar kryeministri në intervistën që ju gjeni më poshtë:
Përse kryebashkiaku i Tiranës, do t’i adresohet edhe votuesve të PD-së në Kavajë, në Shkodër, në Korçë dhe në qytete të tjera?
Këtë pyetje fatkeqësisht nuk do të mund t’ia shtroni dot atij. Sepse ai ka zgjedhur lugën e artë në Bashkinë e Tiranës, peshkun e artë në krye të PS-së, ëndrrën e artë në karrigen time. Po mesa duket këto zgjedhje do t’i rezervojnë atij një fund të ri.
Kështu keni thënë edhe në tre palë zgjedhje të tjera, po fitues ka dalë Edi Rama....
Në asnjërën prej tyre. Problemi është këtu, mungesa e realizmit në vlerësimet e zhvillimeve të bën të adaptosh qëndrimet më të gabuara. Në vitin 2007, Shqipëria ishte thellësisht blu dhe ndër më blutë. Fitoi Tiranën. Ai humbi vendin dhe ruajti kështjellën e tij.
Është kafshata që Partia Demokratike nuk e kapërdin dot në Tiranë...
Do të presim deri ditën e diel. Historiku është i tillë. Historiku i qeverisjes së tij në Tiranë, është e sigurt që kurrë nuk fitoi zgjedhjet e vitit 2003. Zotëria që mban në krah tani, Avokati Ngjela, i dha atij disfatën më të thellë, në atë kohë që zgjedhjet ishin tërësisht jashtë standardeve, u detyrua gjykata të kthejë për përsëritje 138 qendra në Tiranë. Ambasadori i vendit kryesor i shkoi dhe i tha të nesërmen, i fitove me serial zgjedhjet.
I fitoi pra?
I grabiti. Nuk i fitoi. Fitore si ato nuk janë fitore. Kur i merr me dhunë, kur përdor banda, përdor serial killer, ato nuk janë fitore, janë grabitje.
A janë mërzitur shumë vetë në Partinë Demokratike që ju po flisni sot dhe zoti Lulzim Basha, do të flasë nesër?
Përkundrazi, ata që presin bashkëpunëtorët e mi dhe unë nga bashkëpunëtorët e mi, është një fitore e merituar në datën 8 maj. Kam bindjen e plotë se po ecim drejt saj. Gjithçka tjetër i mbetet periferisë së thashethemit. Në fakt, në thelb, kjo ka qenë fushata mund të them në të cilën ekipi drejtues i PD-së, ka qenë më i angazhuar se kurrë në të. Pret me kënaqësi rezultatin e zgjedhjeve më datën 8 maj. Është shumë normale se në zgjedhjet e qeverisë vendore të udhëhiqen nga Tirana. Fushata është një festival madhështor, ku nuk shkëlqen talenti kulturor i qytetarëve, por talenti politik i tyre. A e di ti se çdo shqiptar, në fushatë, bëhet politikan me kohë të plotë?
Kjo zgjedhje e juaja për të folur ju sot dhe Basha nesër, është zgjedhje për këto zgjedhje apo afatgjatë?
Kjo është zgjedhje përfundimtare. Zgjedhjet lokale, do të mbyllen me intervistën apo debatin e qytetarit të parë të Tiranës.
Në rast se do ta humbni Tiranën, do e konsideroni se do t’i humbni zgjedhjet zoti Berisha?
Përpjekja tre shekujt e fundit ka qenë për barazimin e votës. Vota është e barabartë kudo që ajo hidhet. Unë të garantoj, se në rast se zoti Edi Rama, me aleancën e tij për të ardhmen, për vetminë, merr qoftë edhe një votë më shumë se aleanca ime, unë do të them se ai i fitoi zgjedhjet.
Votë për këshilltarët?
Votë në planin e përgjithshëm.
Pra i qëndroni votës popullore, në rang vendi?
Pa diskutim.
A po thoni që këto zgjedhje mund të shndërrohen në një referendum politik?
Për qeverinë?!
Pa dyshim.
Po ajo do të faktohet. Por për qeveritarët vendorë, zgjedhjet s’mund të kenë kurrë karakter politik. Unë të garantoj se zgjedhjet e përgjithshme do të zhvillohen javën e fundit të qershorit 2013. Është e vendosur kjo, është një ABC-ja e kulturës politike. Zgjedhjet në një sistem demokratik kanë një përcaktim kushtetues, i cili ndryshon vetëm në rast të humbjes së mazhorancës në Parlament.
Pra ju thoni se kalkulimi i votave për koalicionet garuese, do të përcaktojë se kush është fitues?
Pa diskutim që po.
Nuk ka asnjë mënyrë tjetër?
Jo. Pse mendoni ju se mund të pranoj unë teorinë e eskimezëve, që nxorën ata në vitin 2007?
Po a ka më shumë peshë vota në Tiranë?
Tirana pa diskutim që është kryeqyteti i vendit, epiqendra e të gjithë zhvillimeve madhore, por në rrafsh qytetar, qytetarët janë të barabartë.
Zoti Berisha, keni 20 vjet që bëni fushata, ky është viti i 21-të, a ndjeheni i lodhur?
Unë ndjehem 20 herë më i përtërirë. Fushata për mua është libri më i bukur, i kam 15 vëllime aty, ky është vëllimi i 16-të. Është një festival i vërtetë. Është një fillim i ri për mua, çdo fushatë. Pas dy vitesh do të kem fillim të ri prapë.
A i keni kalkuluar ndonjëherë zoti Berisha, në këto 15 fushata që keni zhvilluar, sa prej tyre i keni humbur? Dhe si keni reaguar kur keni humbur një fushatë?
Ato që kam humbur, që janë pranuar ndërkombëtarisht, janë 2 prej tyre dhe kam pranuar me gjakftohtësi dhe respekt të plotë verdiktin e sovranit.
Më shumë se dy kam përshtypjen...
Më gjej ti cilat?
Fushatën e parë të 31 marsit 1991...
Pse zgjedhje të lira ishin ato? U damkosën si zgjedhje jo të lira.
Zgjedhjet e 2000-2003...
Të dënuara ndërkombëtarisht. Ka një dënim ndërkombëtar për to. Madje edhe zgjedhjet e 1996, u dënuan. Nëse përjashtojmë këto, dalin dhe janë 2. Fatmirësisht nuk jam gjithnjë fitimtar.
Si ka qenë kjo fushatë krahasuar me të tjerat?
Më e bukura. Ka disa risi, ju përmbajtja deklaratës për një fushatë në dietë. Fushatë në të cilën, edhe kryeministri i vendit përdori një mjet të marrë me qira. Mbi shpatullat e taksapaguesve, kushtoi shumë më pak. Kjo është një fushatë, në të cilën qytetari, më shumë se kurrë u vu në epiqendër. Ne flisnim për qytetin, zoti Rama fliste për fajin e Berishës. Më në fund ai u rikthye dhe u kujtua se ka qytet, ka projekte, ka zhvillime. Fushata ka një dimension interesant, atë dixhital. Në fushatën e kaluar, në vitin 2009 i vura vetes qëllim të zhvilloj fushatën elektronike. Morra një këshilltar i grupit të Presidentit Obama, nga Florida. Nuk ishte ndër kryesorët por ishte përgjegjës për fushatën dixhitale dhe e zhvilluam shumë mirë. Në këtë fushatë ka një risi pozitive, Facebooku. Është mënyra më sociale e komunikimit. Fakti që për qytetarin e parë të Tiranës, u angazhuan në Facebook mbi 250.000 nga të cilët sipas qendrës së statistikës së kësaj faqeje në Amerikë, 136.000 janë në Tiranë.
Opozita tha se janë të blerë?
Të vetmen gjë që nuk mund ta bësh kurrë. Nuk e blen dot një njeri në Facebook.
Nëse 130.000 veta janë në Tiranë, atëherë ju i paskeni fituar zgjedhjet?
Nuk besoj të ketë fëmijë në klasë të 5 e sipër që nuk janë në Facebook. Por këta janë individë me një influencë të fuqishme në familje. Nuk ka asnjë lajm më pozitiv për Lulzim Bashën, se sa në familje të thotë djali ose vajza se komunikova me Lulzim Bashën.
Zakonisht të rinjtë janë shquar gjithnjë si fansa të Ramës?
Asnjëherë. Po të them një shkrim të një prej organeve më serioze në botë “The Ekonomist”. Pas zgjedhjeve të 2009 thotë: Ndonëse është 20 vjet më i ri se Berisha, ajo që është e paimagjinueshme për të, është se Berisha pati mbështetje 17% më tepër se Rama. Rama as nuk i ka pasur, as nuk i ka dhe as nuk do t’i ketë të rinjtë me vete. Rama nuk mund t’i ketë, sepse ai është arrogant. Të rinjtë arrogancën nuk e pranojnë kurrë.
E për se do të jetë fans i Lulzim Bashës një i ri?
Sepse i ka bindur ata se do të punojë për Tiranën e ëndrrës së tyre. I ka bindur. Ata kanë besim sepse kanë një ëndërr për Tiranën.
Ju keni Facebook apo jo?
Ekzistojnë shumë faqe në Facebook të miat. Do të hap të parën, e kam vendosur së pari me mbesën time e më pas do të kem lidhje me të tjerët. Por duhet të marr më parë pëlqimin e saj. Por po, do të kem një faqe sigurisht.
Megjithatë, kjo Tiranë që kemi sot, është shumë më ndryshe se Tirana e 10 viteve më parë. Zoti Rama i ka dhënë Tiranës një frymë të re....
Tirana natyrisht është larg nga Tirana e 10 viteve më parë. Ka zhvillime pozitive, por ka zhvillime nga më dramatiket. Tirana këto 10 vite, ka njohur zgjerimin e 3 akseve kryesore, një bojatisje të pallateve, fenomen ky që është përshtatur në disa kryeqytete të botës. Mendoj se është bërë shumë mirë, por duhej më shumë. Kam parë kompani të madha që kanë sjellë projekte për pallate të sistemit komunist, për ti përmirësuar, ndryshuar. Megjithatë e quaj pozitive, bojatisjen. Së treti, është e vërtetë që e ktheu Lanën në kushte të mira, por vetëm 2 km. Por ana tmerrësisht regresive, krahasuar me diktaturën, është shpartallimi total i urbanistikës së këtij qyteti. Tirana ishte ndërtuar me lagjet e saj të shtëpive, të tiranasve dhe dibranëve, me një sistem të përsosur, me urbanistikë të shkëlqyer, me kopshte të gjitha dhe pjesa tjetër pallate, të gjitha me hapësira të mëdha. Tirana sot ka pallate të shëmtuara, që në këto 10 vite zoti Rama e shkatërroi në mënyrën më të paimagjinueshme. Kioskat ishin fenomeni i parë i rënies së perdes së hekurt. Ra perdja e hekurt, falimentuan dhe kapitalizmi në vendet ish komuniste filloi me kioskat dhe ato nisën me një leje të përkohshme. Ato u shndërruan nga uzinat dhe fabrikat e falimentuara, në punësim për banorët. Patën anën e punësimit, por edhe të shëmtimit. Nuk i mohoj ato. Tirana kishte transport publik, të saktë, me orare të gjitha. Ku është sot? Transporti publik sot është nga më të mundimshmit, të papranueshmit. Këto janë të gjitha elemente, jo të një kryeqyteti. Ka pasur me dhjetëra terrene sportive, janë zënë të gjitha pas vitit 2000. Lulishtet u zhdukën njëra pas tjetrës në mënyrë të paimagjinueshme. Ka një raport themelor, përcaktues, raporti i qytetit me qytetarin.
Si është ky raport sipas jush?
Ky raport është më çnjerëzori që ekziston. Sot ka 180m beton me 2-3 m hapësirë. Tiranasit jetojnë sipas agjencisë evropiane të mjedisit, në qytetin me ndotje më të madhe në Evropë. Qytetari i Tiranës jeton me sipërfaqen më të pakët të gjelbër në Evropë. Kryetari i bashkisë së Tiranës thotë se ka mbjellë 55.000 pemë kur Vjena ka 100.000 të tilla, që është kryeqyteti me gjelbërimin më të madh në botë. Rama thotë se ka mbjellë 55.000 për të justifikuar para qytetarëve të Tiranës 17 milionë USD për pemë dhe nuk i ka mbjellë. Janë prerë më shumë pemë se sa janë mbjellë. Këto 20 vjet si një zhvillim evropian në këtë kryeqytet, nuk është bërë asnjë gjë e vetme.
Baret, restorantet, jeta e natës...
Ky është aspekti tregtar. Po flas në rrafshin e zhvillimit urbanistik e kulturor. Të rinjtë tanë, po të shkojnë në kryeqytetet e tjera, marrin një hartë. Po në Tiranë çdo vizitosh? Ne, jemi të detyruar ta bëjmë Tiranën që të ketë çdo gjë. Tirana ka në qendër një lagje, që nuk është e madhe, po është perlë, tek Kalaja. Në Tiranë duhet të ndërtohet kartolina e saj. Këtu lufta bëhet për piramidën, a e kupton? Nuk bëhet për zhvillimin.
Meqë dolëm tek piramida, zoti Basha tha se nuk është për prishjen e piramidës, ju keni thënë po....
Nuk është vetëm zoti Basha, janë shumë të tillë. Tirana duhet të jetë Tirana Evropiane. Kush e pengoi zotin Rama ta bënte këtë? Kur unë kam parë në media lumin e Tiranës, dëshpërimi im ka qenë shumë i thellë.
Përse?
Të pranojë kryeqyteti një lum ku të hidhen plehrat e kryeqytetit në vend që ta shndërrojë në një nga zonat më të mira të Tiranës, kjo është dëshmi e një dështimi të pafalshëm. Në Durrës, është një rajon i Kallmit, është bregu i detit midis Currilave dhe Bishtit të Pallës, ishte një distancë 8 km. Çmimi për të ndërtuar një bulevard aty ishte 7 milionë euro. Në qoftë se kryebashkiaku i Durrësit do të kishte pasur vizionin për të ndërtuar një nga bulevardet më të bukura, mund ta kishte ndërtuar me të ardhurat e qytetit të tij. Madje jo një, po tre deri tani.
Po paratë duhen për të shtruar rrugët e brendshme...
Nëse zoti Rama, donte të ndërtonte dhe jo ta bënte kosh plehrash lumin e Tiranës, ai ato miliona euro nuk do t’i shndërronte në rroga, të 4-5 fishonte numrin e punonjësve të bashkisë, por me trefishimin e granteve që bëmë ne me bashkinë...
Po ja jepni dhe më pas, ja bllokoni me këshillin bashkiak?
Asnjë qindarkë. Nuk ka dashur ai të bëj buxhet. Këshilli bashkiak kurrë nuk do ti votonte që të harxhohet 25% e buxhetit të bashkisë për rroga. Në një kohë kur harxhohet 6% e buxhetit të qeverisë për rrogat e të gjithë administratës qendrore. Rama është përgjegjës direkt i asaj tullumbace të madhe administrative dhe rrogat në vend që të shkojnë për qytetarët e Tiranës, shkojnë për rrogëtarët e tij. 24.000 biznese ishin në vitin 2006. Për shkak të përgjysmimit të taksave që ne bëmë, ato arritën deri në 50 e ca mijë të tillë. Rama në mënyrën më të papërmbajtur shumëfishoi taksat që kishte në dorë vetë dhe sot Tirana nuk ka investime. Adaptoi sistemin më të lartë të taksave. Tirana mund të shndërrohej në këtë periudhë në një gjenerator gjigant punësimi.
Zoti Rama tha se do të hapë 300.000 vende pune në vitet e ardhshme....
Tani kuptova se kur Fatos Nano bëri fushatën në vitin 2005, deklaroi se do të krijojë 200.000 vende pune, ia paska dhënë Rama, se paska mani për statistika ky. Ka dy muaj që u thotë shqiptarëve, se ka 1 milion të papunë si Ramiz Alia, tani thotë se do hapë 300.000 vende pune. Nesër prit kur të thotë 500 mijë. Ka një shprehje që thotë, po më gënjeve një herë fajin e ke ti se të besova, por po më gënjeve për së dyti..., shqiptarët nuk e besojnë më.
Po meqë Edi Rama ka fituar 3 herë në Tiranë, përse është divorcuar tre herë PD me Tiranën? A shihni ndonjë gabim ju në raport me Tiranën?
Ka pasur një gabim në fushatën e vitit 2007, më doli jashtë kontrolli emetimi i një spoti që nuk duhej emetuar dhe për të cilin unë mbaj përgjegjësi. Ai që nxirrte zotin Rama në plazh. Ai nuk duhej bërë.
Ju nuk ishit entuziast për atë spot?
Po të kisha qenë vetë, nuk do e kisha lëshuar atë spot.
Po në vitin vitin 2000 dhe në vitin 2003?
Në vitin 2003 fituam, për vitin 2000 nuk them dot, sepse zgjedhjet ishin katastrofë.
Dhe në vitin 2009, vota në bashki nxjerr fituese PS-në?
Jo, jemi ne pak përpara në Tiranë, bashkë me LSI-në në Tiranë jemi shumë përpara.
Sa vendimtarë do të jeni ju në fitoren apo humbjen e zotit Basha?
Në fitoren apo humbjen e zotit Basha, natyrisht përcaktuese do të jetë vetë Tirana. Mendoj, se zoti Basha kandidon si zyrtari më i kompletuar në historinë e këtij kryeqyteti. Ka një pasaportë të shkëlqyer në investimet publike, në marrëdhëniet ndërkombëtare, në Ministrinë e Brendshme.
Kishte dhe një pasaportë gabim në një akt noterial?
Ja ku ra Rama! Bëri flamur të fushatës së tij, lapsusin e një noteri holandez. Ajo dukej që ishte një lapsus.
Por opozita mendon se zoti Basha është një sozi e juaja?
Zoti Rama ka një dhunti, në politikë është njeriu që i bie më shpesh se kushdo tjetër murit me kokë.
Por rezulton se nuk e ka çarë kokën asnjëherë për sa kohë vazhdon të jetë?
Po ai fitore nuk ka. Nuk regjistron dot një fitore politike në gjithë karrierën e tij.
Po është marrja e drejtimit të PS-së...
Ia dha Fatos Nano dhe Sali Berishën. Ia dhamë ne të dy bashkë. Absolutisht.
Si ia dhatë ju?
Unë fitova zgjedhjet ndaj Nanos. Nano bëri një akt qytetar të përgjegjshëm, dha dorëheqjen dhe ai u bë kryetar partie. Nano mund edhe mos ta jepte dorëheqjen.
Po mund ta fitonte dikush tjetër?
Jo, ia dhanë. Ai s’ka fituar asnjëherë politikisht sepse çdo vendim që merr, e merr të dështuar. Ai po bën një imitim të pafalshëm kandidatit tonë.
Dy kolegët e mi thonë, zoti Andi Bejtja ju ka hequr nga lajmi i parë dhe ka nxjerrë zotin Basha. Zoti Andi Bushati thotë që ju nuk keni guxuar as të dilni në krah të zotit Basha në Tiranë, nga frika se mos i hiqni atij vota. Është e vërtetë?
Kam dalë me të në hapjen e fushatës dhe mbyllja e fushatës me të do të jem. Zoti Basha bëri një punë të dobishme me strukturën e partisë. Roli im si kryetar i PD-së në fushatë, është të garantoj mbështetjen e plotë të strukturave dhe kandidatit. Këtë bëra unë kudo. Basha bëri një punë intensive me të gjitha strukturat e PD-së në Tiranë dhe pati një impakt shumë pozitiv. Kjo më bëri mua ta trajtoj Tiranën në rrafshin partiak njëlloj si Shkodrën, Elbasanin etj.
Cila ishte kjo punë paraprake?
U takua me ta. Me të gjitha strukturat e partisë.
U prit mirë nga strukturat e partisë?
Jashtëzakonisht.
Ka ndodhur të ketë pasur thyerje në strukturat e partisë në të kaluarën për kandidatët?
Ka ndodhur qartë. Ndërsa zoti Basha bëri një punë që nuk e kanë bërë kandidatët e tjerë. Për një muaj rresht, pa asnjë lloj lajmi, zhvilloi takimet me të gjitha strukturat e Tiranës. Vendosi raportin e mirëbesimit me to. Ajo që ka bërë Bejtja për mendimin tim është risia më madhore e kësaj fushate. Sepse kryelajmi për një fushatë vendore, është Tirana. Të gjithë shohin më me interes Tiranën, se sa udhëtimin tim në një qytet. Se ka impakt më të madh kryeqyteti, u vu aty ku e meriton.
Është hera parë që ju shoh të kënaqur edhe pse ju nuk jeni lajmi i parë...
Po prit 2013-tën. Unë duhet të jem aty ku duhet të jem. Mos më krahaso ti mua me rivalin tim që kandidon edhe për këtë, edhe për atë. Unë kandidoj për kryeministër. Kam deklaruar, edhe President jo.
I qëndroni kësaj ideje? Nuk do jeni asnjëherë president, ju i keni votat?
Absolutisht i qëndroj. Unë jam kryeministër. Madje nuk më vjen mirë, që të shoh të ndërrohen rolet në fushata elektorale.
Ka dy kontradikta në programin e PD-së, zoti Basha ka thënë se sapo të zgjidhet do të ketë moratorium për ndërtimet në Tiranë, sa të bëhet plani urbanistik, ndërsa ju keni ftuar Komunitetin Mysliman të ndërtojë një xhami tek Namazgjaja, një lulishte nga të paktat në kryeqytet. A nuk është një kontradiktë?
Historiku i xhamisë në Namazgja është disavjeçar. Zoti Rama, me një farsë elektorale të gabuar, shpalli se do e ndërtojë xhaminë, aty ku janë pronarë 80 familje dhe për shkak të mospërputhjes mes tyre ne e mbyllëm, e bëmë lulishte dhe kaq. Tani, zoti Rama, bëri një akt shumë të rëndë. Për ata që njohin besimin Islam, e dinë që dy porositë e fundit të profetit janë, unë jam vdekatar dhe mos prek pronën e tjetrit. Që të dalësh në fushatë e tu thuash myslimanëve që do të ndërtojë xhaminë, duke grabitur pronën, e të dalin pronarët të kundërshtojnë, kjo është e rëndë. E bën vetëm për të marrë vota, por vetëm humbet vota. Asgjë nuk ndërtohet në pronën e grabitur. Rama u ka marrë myslimanëve 1 000 m2 tek Namazgjaja dhe ne ia kompensuam.
A mund të negociohet me Komunitetin që të gjendet një vend tjetër?
Edhe kjo mund të bëhet. Xhamia do të ndërtohet, por jo në prona të grabitura.
Zoti Basha deklaroi se ndoshta nuk është për shembjen e piramidës, ndërkohë që është vënë në punë projekti për ndërtimin e piramidës...
Secili në vendin e tij. Zoti Basha shprehu një mendim. Ai theksoi se nuk është për prishjen, ndonëse piramida nuk ka vlera historike.
Mund të ndërtohet diku tjetër?
Me këto ndërtesat e shëmtuara të socializmit, unë nuk i fsheh qëndrimet e mia. Unë po të isha kryetar bashkie, do të bëja një referendum edhe për Pallatin e Kulturës. Ndërtesat e ndërtuara në periudhën e socializmit, janë më të dështuara nga ana arkitekturore. Ato u shembën 20 vite pas ndërtimit në shumë vende të botës.
Cili është opinioni tuaj për kasetat në fushatën elektorale, parapërgatitjen e lajmeve?
Unë nuk punoj kurrë me kaseta, i ftoj të gjithë aty ku shkoj. Vetëm po shkova në zona shumë të largëta, mund t’i ndihmoj për aktivitetin. Nëse Rama, pranoi të diskriminojë median, Basha nuk e bëri këtë. Rama fton në takimet e tij vetëm 3 kanale televizive. Dhe një herë që mori vesh një kanal tjetër televiziv, e përzunë me fyerje dhe sharje. Pra fton vetëm media që ka nën kontroll. Dhe i urdhëron ato. Frika e Ramës ndaj zotit Basha në rrafshin psikologjik e çoi në këtë gjë. I tha gazetarit, se Basha nuk ekziston. Kjo është frika ekstreme. Kur individi ka aq shumë frikë, ai ka si rrugë shpëtimi vetëm mohimin e ekzistencës. Shpresoj që data 8 maj ti zgjidhë këto probleme.
Për se zgjodhët të mos bëni fushatë negativiste, por u përqendruat. Nuk ka asnjë spot negativist, asnjë akuzë ndaj kreut të bashkisë, ka vetëm ofertë?
Ligji i artë është 80% me 20%, pra më shumë pozitive, 20% negative. Këtë herë e minimizova tek 5%. Ekipi që mori zoti Basha për fushatë solli risi. Nuk duhet që asgjë politike të mbulojë dobësi, të meta, gropat dhe defektet. Ndryshe qytetari nuk do të merret me problemet e tij, por me habinë politike. Unë vetë ndikova fuqishëm tek të gjithë kandidatët që t’i përmbahen kësaj linje. Fundi i fundit edhe ne kemi si detyrë që të kapërcejmë gabimet. Duke përjashtuar disa elementë fondamendalistë, siç është për shembull, “E vetmja rrugë”. Në qoftë se shkoni në arkiv dhe merrni veprat e Enver Hoxhës, gjëja më e cituar në to, është e vetmja rrugë. Ky është slogani më ordiner dhe prezent në këto vepra.
Qëndroi 46 vjet në pushtet me këtë slogan...
Qëndroi se ishte perdja e hekurt, se ai nuk qëndronte as 6 ditë. Romani i Aziz Nesimit, “E vetmja rrugë”, është e një personazhi i cili është personifikimi i të keqes dhe justifikonte të gjitha të këqijat e tij sepse thoshte, kjo është e vetmja rrugë. Apo “Kurrë më”, gjë e cila vetëm politikisht nuk mund të përdoret. Kjo është logjikë që buron nga mentalitet totalitar. Më pas erdhi duke u tërhequr.
Zoti Rama ka qenë një lloj pionieri për qytetin. Në vitin 2000 ishte i pari që foli për qytetin...
Zoti Rama vetëm qytetin që nuk e njeh, njeh disa aspekte të tij, si aspektin fasadë. Unë kam vlerësim për fasadën, se ajo duhet. Por nuk mjafton, sepse fasada nuk mund të zëvendësojë brendinë.
Ka pasur një seri incidentesh në këtë fushatë që e kanë bërë atë shumë shqetësuese. Çfarë po ndodh realisht?
Kanë qenë të dënueshme. Ndikim ka pasur gjuha e ashpër me të cilën filloi fushatën kundërshtari im. Janë të padenja, të papranueshme, i kam dënuar dhe dënoj çdo akt dhune, nga cilido që kryhet. Të gjitha strukturat tona kanë porosi të shmangin çdo lloj eksesi. Ne jemi të përcaktuar për një proces zgjedhor të lirë dhe të ndershëm. Çdo javë kam shfrytëzuar mbledhjet e Qeverisë për të treguar qëndrimin më të ashpër ndaj këtyre akteve.
A rrezikojnë këto incidente ta prishin mbarëvajtjen normale të këtyre zgjedhjeve?
Jo, zgjedhjet nuk prishen.
A është policia në lartësinë e duhur për t’i parandaluar këto incidente?
Policia ka qenë në lartësinë e duhur. Ka qëndruar fuqishëm ndaj secilit prej tyre me vendosmërinë më të madhe. Ka vepruar në kohën më të shpejtë.
A ka qenë e baraslarguar nga dy forcat politike policia? Ka një akuzë nga shefi i forcave speciale, që ka dashur të përdoret nga zv.ministri i Brendshëm?
Kjo akuzë është në prokurori. Di që PS nuk ka formuluar akuza ndaj policisë.
Mendoni se policia mund ta kontrollojë situatën?
E kontrollon plotësisht. Është e vendosur të zbatojë ligjin. Thirrja ime ndaj të gjithë komisionerëve është të bëjnë çdo gjë për të zbatuar ligjin. Shfrytëzoj këtë rast edhe një herë për të bërë thirrjen time, kërkesën time më të prerë dhe më miqësore, të administrojnë në përputhje me ligjin çdo votë. Të bëjnë gjithçka.
Ju keni zhvilluar takime së fundmi me ambasadorët ndërkombëtarë në vendin tonë, cili ishte shqetësimi i tyre.
Ata erdhën me kërkesën time.
Ka një shqetësim se mund të ketë një prishje të procesit të votimit për arsye të tërheqjes së komisionerëve të opozitës, ditën e zgjedhjeve. A i druheni kësaj?
Ka disa elementë shqetësues, një pikëpamje që ekziston se zoti Rama do të bojkotojë zgjedhjet për shkak të rezultatit që nuk e ka, etj. Por unë nuk jam i prirur t’i besoj këto. Unë kam prirjen të besoj plotësisht në përgjegjësinë dhe integritetin e komisionerëve të të gjitha forcave politike. Kam besimin se do t’i përmbahen ligjin. Nuk besoj se opozita do të ripërsërisë atë që bëri në vitin 1996, se do të ishte një kthim pas.
A jeni të vendosur të zhvilloni zgjedhje të lira, të ndershme, të drejta?
Absolutisht, më i vendosur se kurrë. Zgjedhje të ndershme, të drejta dhe të paanshme ishin ato të vitit 2009, ku askush nuk vuri në diskutim rezultatin dhe ligjshmërinë e institucioneve. Por këto zgjedhje, do të kenë përmirësime të tjera, kanë ligjin e financimit të partive politike, kanë qëndrimin e ri të administratës ndaj zgjedhjeve, të shpenzimeve, kanë risi pozitive në krahasim me zgjedhjet e mëparshme. Jam i prirur të respektoj çdo votë, të njoh çdo rezultat ndërkombëtarisht të certifikuar.
Po nëse kundërshtari juaj nuk i njeh zgjedhjet?
Ky nuk është problem i kryeministrit, por i raportit personal të tij me qytetarin shqiptar. E vetmja gjë që unë nuk mund të zgjidh është ky raport. Zoti Rama kundërshtoi një proces që më vonë u deklarua nga faktori ndërkombëtar si procesi më i saktë në botë, ai i numërimit të votave në vitin 2009.
Kush do t’i certifikojë këto zgjedhje?
Zgjedhjet certifikohen nga faktori ndërkombëtar, OSBE/ODIHR.
Ju do të njihni çdo rezultat të certifikuar nga OSBE/ODIHR?
Pa diskutim. Nuk vihet në dyshim. Nuk mund të ndodhë në një vend të qytetëruar të thërrasësh arbitrin dhe t’i thuash jo më pas.
A do të aplikohet standardi i kutive të hapura në këto zgjedhje?
Standardet ekzistuese janë standarde ndërkombëtare, dhe përveç kësaj janë miratuar me konsensus të plotë të dy forcave politike.
Ka pasur akuza ndaj KQZ, që po merr vendime politike në disfavor të opozitës...
Kolegji Zgjedhor ka nja tre vendime që i ka marrë në favor të opozitës. Ke dëgjuar ti të bëjmë ne ndonjë koment për to? Jo. Kurse zoti Rama i duartrokiti këto, por vendimin për mosnumërimin e materialeve të pakontestuara, e mbajti për dy vjet si vendim politik të pabazuar. Ne kemi sistem që ka faktuar veten, objektiv në shqyrtimin e ankesave dhe që jep mundësi të plotë shqyrtimi për çdo ankesë.
Çdo të ndodhë dhe çfarë dëmi ka Shqipëria në integrimin e vendit, nëse këto zgjedhje nuk funksionojnë normalisht?
Së pari, duhet t’i ndajmë çështjet. Kapitalet për zgjedhjet në vend është që përfaqësuesit e mazhorancës të zbatojnë me rigorozitet ligjin dhe Kodin Zgjedhor. Kjo do të thotë, që çfarëdo që të ndodhë, e marrim sikur të gjithë komisionerët socialistë të largohen, zgjedhjet komprometohen nëse komisionerët e mazhorancës do të përfitojnë nga kjo dhe do t’i hapin rrugë abuzivitetit. Zgjedhjet ruajnë integritetin e tyre në qoftë se çdo komisioner i qëndron ligjit dhe e konsideron veten jo vetëm si komisioner politik por përfaqësues të qytetarëve para ligjit. Në këtë rast, garantoj unë, zgjedhjet nuk mund të dëmtohen. Kam besim të plotë, sepse unë nuk kam arsye të dyshoj në 20 mijë komisionerë socialistë, se ata kanë dëshmuar veten plotësisht si qytetarë të përgjegjshëm para ligjit dhe jam i bindur se në këto zgjedhje sërish do ta dëshmojnë këtë, sepse ata njëlloj si kolegët e tyre në komisione, janë të interesuar të kontribuojnë për integrimin e vendit.
Ka pasur një premtim të zotit Basha, sipas të cilit, ndërtimet e aprovuara nga ju dhe zoti Rama për tu ndërtuar pranë Liqenit Artificial, nuk do të ndërtohen sa kohë të jetë ai kryetar i bashkisë së Tiranës. A i qëndroni ju këtij vendimi?
I qëndroj plotësisht në këtë kuptim. E theksoj se nuk është kurrë kryeministri, administrator i territorit të bashkive apo komunave. Janë qeveritë vendore dhe kryetarët e bashkive dhe komunave. Nuk kam ndërhyrë dhe nuk do të ndërhyj, sepse në qoftë se kryeministri si kryetar i KKRRT, merr përsipër probleme të administrimit të territorit, ai duhet të lërë detyrën e kryeministrit. Jo vetëm zotit Basha, por edhe kryetarëve të tjerë u bëj të ditur, se kryeministri do të pranojë dhe do të zbatojë propozimet e tyre që bëhen në përputhje me ligjet. Kryeministri pas këtyre zgjedhjeve, do të ndërmarrë hapa të tjerë të rëndësishëm në drejtim të decentralizimit të pushtetit vendor. Me bindjen se është një kusht i rëndësishëm për konsolidimin e mëtejshëm të demokracisë. Garantoj që pas zgjedhjeve, një paketë e re fiskale që u bllokua nga zoti Rama në mënyrë të gabuar, do të kalojë dhe do të plotësohet. Do të bëjmë gjithçka që bashkitë të bëjnë financat e tyre fizibël, që të mund të marrin kredi nga institucionet ndërkombëtare. Një nga vendimet e para pas ardhjes në pushtet në 2005, ka qenë deklarimi i partneritetit midis qeverisë qendrore dhe vendore. Ka pasur tre efekte. Ndër to ishte, që nëse granti për pushtetin vendor u gjet 7 miliardë lekë, sot është 35 miliardë lekë. Tirana sot është 3 ose 4 herë më e madhe se 20 vjet më parë. Është fatkeqësi absolute, kur kujton se gjatë diktaturës ishte më e decentralizuar se sot. Nuk ndodhte kurrë që të shkoje te Komiteti Qendror, për të lëvizur një gozhdë, një mur. E merrje në lagje. Sot Tirana është i vetmi kryeqytet në botë, kur për të lëvizur një derë, vendos kreu i bashkisë. Zoti Basha është shprehur për decentralizim të qenësishëm. Qeveria do të përgatisë një akt të dytë të rëndësishëm të decentralizimit të pushtetit vendor.
Çfarë do të ndryshohet në luftën e papunësisë?
Në ekspozenë e parë të programit, zoti Basha shpalli luftën ndaj papunësisë, si objektiv madhor. Të shumtë e quajtën spekulim, por e vërteta është se askush nuk ka të bëjë më shumë dhe nuk ka mundësi më të mëdha për punësimin se sa kryetarët e bashkive. Janë shumë më të mëdha se sa qeveria vendore. Ata që kanë të gjitha mundësitë për të intensifikuar, shndërruar bashkitë dhe komunat e tyre në zona tërheqëse për investime, janë qeveritarët vendorë. Kryetari i bashkisë duke thithur investime mund të krijojë vende pune më shumë se kushdo tjetër. Këto zgjedhje janë për të zgjidhur problemet e qytetarëve dhe për të ndërtuar një të ardhme tjetër. Të flasë sot kreu i bashkisë për ulje taksash, kur i ka katërfishuar ato, është cinizëm maksimal. Çfarë e pengon kryetarin e bashkisë, të japë me koncesion zonën rekreative të lumit të Tiranës. Kryetari i bashkisë duhet të çlirohet me shpejtësi të rrufeshme nga leja e ndërtimit. Një letër që të bën milioner. Qytetin e bën betoni. Bashkia e Tiranës, është i vetmi institucion në botë që nuk merr dot kredi nga institucionet ndërkombëtare, për shkak të financave të kolapsuara që ka. Zoti Basha do të shëndoshë financat, do të marrë kredi dhe do të hapë punë publike. Me të do të hapet një kapitull i ri, nuk ka pasur dhe nuk ka asnjë diskriminim në asnjë rast. Qytet që kanë marrë më shumë të ardhura janë ato të drejtuara nga socialistët.
Si e vlerësoni situatën parazgjedhore?
Në tërësi incidentet janë aspekt i shëmtuar. Fushata vetë po more parasysh fjalimet dhe paraqitjet, manifestimet, tubimet, mendoj se ka qenë e mirë. Ka qenë më pozitive se fushatat e tjera. Aspekt i papranueshëm për mua ka qenë aspekti mediatik sepse nuk e mendoja se do të bllokohen debatet midis kandidatëve, që janë jashtëzakonisht të domosdoshme në mediat kombëtare. Kjo është e dëmshme, që shpresoj të mos përsëritet më. Nuk duhen pasur frikë debatet, sepse mund të humbasësh debatet por zgjedhjet mund ti fitosh, është e faktuar kjo.
Cili është raporti brenda koalicionit tuaj? Si u ndërtua ky koalicion i madh?
Porosia ime ka qenë që me aleatët tanë të jemi të hapur, zemërgjerë sepse aleanca ndërtohet jo për një moment por për afat të gjatë. Fushatën time unë e bazoj në aleanca dhe premtime. Përpiqem gjithnjë të bëjë aleancën më të gjerë, e cila më kushton, sepse votat e PD-së nuk është se i mbledh më mirë, por nga ana tjetër ka avantazhe të pakompensueshme.
Akuzoheni nga PS se nuk keni dhënë kontribut si qeveri për shpronësimin e tokës ku do të ndërtohet Unaza e Madhe. Çfarë kontributi do të jepni ju si qeveri në këtë proces, me zgjedhjen e zotit Basha? Po për hipotekimin e pallateve?
Unaza është bllokuar nga zoti Rama. Në udhëtimin tim në vitin 2006 në Londër, në Bankën Evropiane për Zhvillim, një nga kërkesat që kam bërë, ka qenë financimi për Unazën e madhe. Ajo u pëlqye, u vlerësua u miratua. Ndodhi që Rama, duke qenë edhe për kryetar bashkie edhe për kryeministër, nuk i vinte për shtat që të uleshim dhe të vendosnim bashkërisht. Ai kërkonte që të gjithë autoritetin për ndërtimin e unazës, ta kishte ai. Por autoritetin se kishte të gjithin ai. I thashë të krijojmë një grup të përbashkët, nuk pranoi. Një segment i shkurtër, as 200-300 m për t’u shpronësuar tek INSIG-u, dakord u shpreha dhe i dhashë fjalën. Zotëria, donte të merrte të gjithë këtë trase, 6 korsi të rrugës midis ish estradës dhe muzeut kombëtar, t’i zinte dy si një grykë shisheje, sepse ishte pallati i një miku të tij. Aty i thashë jo. Ose hape me 6 korsi siç e pranoi Banka Botërore. Ndaj nuk e bëri. Edhe zoti Basha të më thotë tani, atë nuk e bëj. Ramës nuk i është penguar asnjë projekt nga qeveria, por ai i kishte zgjidhje të veta. E kam dëgjuar gjithë këto kohë se e ka penguar qeveria, po kush e pengoi të kishte financa publike fizibël për të marrë kredi? Se qeveria se pengon dot këtu.
Përse për dy vjet rresht janë penguar lejet e ndërtimit në Tiranë?
Shkakun e vërtetë nuk e di se është atribut tërësisht i kryetarit të bashkisë, sepse ka pasur edhe shumicën në Këshillin e Rregullimit të Territorit. E sigurt që pas, qëndrojnë interesa klienteliste. Qeveria nuk ka asnjë lidhje me lejet e ndërtimit në kryeqytet.
Ka disa zona që varen nga qeveria, zona muzeale besoj?
Zona muzeale ka pasur vetëm sheshin piramidë. Aty po vazhdohen punimet, nuk kundërshtojmë asgjë veç piramidës. Duhet të shkëputemi nga rrjeti i mortit. Piramidat janë arkitektura e ritit të mortit. Edhe faraonët nuk i ndërtuan në qendër të qytetit, por anash. Ky kërkon monumentin e mortin në qendër të qytetit. Instituti e ka penguar. Qeveria nuk e pranon piramidën.
A mendoni se bashkia ka vështirësi të marrë kredi, se ka pasur konflikte për planet rregulluese të bashkisë së Tiranës?
Plani urban është një nga dështimet më spektakolare të kreut aktual të bashkisë. Kushtetuta e një qyteti është plani urban. Rama kur erdhi si kryetar bashkie, e injoroi një plan të hartuar nga austriakët për Tiranën e madhe. Premtoi planin urban të Tiranës, që edhe sot e kësaj dite nuk e ka. Nuk e ka jo se ai nuk mund të ndërtohej se për 10 vjet mund të hartohej të paktën 5 herë, po se ai nuk të lejon më të shfrytëzosh lejet e ndërtimit si lugën e artë. Se po u bë plani urban, leja e ndërtimit është proces automatik. Ai sot e kësaj dite e ka në sirtar. Plani nuk ka lidhje në këtë mes me qeverinë, e ka futur ai në sirtar. Jam i bindur se kryetari i ardhshëm i bashkisë së Tiranës, do e trajtojë këtë problem me seriozitetin më të madh. Rama e bllokoi këtë plan për 11 vjet, Basha deklaroi se do e bëjë realitet për një vit.
FUND
