Tiranë, 11 maj 2011, NOA - Partia Demokratike reagon pas deklaratës së zëdhënëses socialiste Mimi Kodheli duke akuzuar se janë komisionerët socialistë ata që ndërpresin numërimin e votave në mënyrë të njëanshme.
Zëdhënësja e PD-së Albana Mustafaraj theksoi në një konferencë për shtyp se në asnjë minibashki në Tiranë nuk është ndërprerë numërimi nga komisionerët e djathtë.
Mustafaraj i cilësoi akuzat e Kodhelit si të pabaza, dhe të tilla që kërkojnë të shmangin vëmendjen nga numërimi i votave në ato njësi ku kandidati i të majtës Edi Rama është në disavantazh ndaj kandidatit të djathtë Lulzim Basha.
Zëdhënësja e PD-së sqaroi se komisionerët e Partisë Demokratike nuk kanë ndërprerë procesin e numërimit pa konsensusin e përfaqësuesve të PS-së, në asnjë njësi bashkiake”.
Sipas PD-së Partia Socialiste po rreket të bllokojë procesin e numërimit të votave, duke e argumentuar me faktin se në njësinë nr. 8 në Tiranë janë numëruar 11 kuti më pak se në njësinë bashkiake nr. 5.
Mustafaraj u shpreh se Partia Demokratike është e angazhuar të lexojë çdo votë dhe në mënyrë sa më të shpejtë.
mit/NOA
