Tiranë, 13 maj 2011, NOA- Në një deklaratë të ditës së sotme, Partia Drejtësi, Integrim dhe Unitet deklaroi se në rang kombëtar ajo renditet forca e katërt politike.
Zëdhënësi i kësaj partie Ardit Bido u shpreh se, votat e PDIU janë vota të pastra, falë besimit të qytetarëve shqiptarë tek fryma dhe parimet e kësaj partie.
“Rezultatet e PDIU-së në bashkitë dhe komunat ku ka kandiduar janë pozitive. Kandidatët e PDIU-së kanë fituar garën në bashkitë Librazhd, Sukth dhe Rrogozhinë, si edhe në komunat Markat dhe Shushicë. Partia Drejtësi, Integrim dhe Unitet rezulton forcë e parë politike në Bashkinë e Delvinës dhe në disa komuna; forcë e dytë në Bajram Curri, Peqin, Kashar dhe një sërë komunash. Forcë e tretë politike në qendra të mëdha të vendit si Vlorë, Durrës, Fier, Sarandë, Rrëshen, si edhe në bashkitë Shijak, Sukth, Cerrik, Patos, Konispol e në një pjesë të konsiderueshme të komunave të vendit. Në Tiranë, si edhe në bashkitë Berat, Elbasan dhe Lushnje, PDIU është afirmuar forcë e katërt politike”, deklaroi Bido.
a.y/NOA
