Tiranë, 15 maj 2011, NOA – Ka nisur mbledhja e shumëpritur e Komisionit Qendror të Zgjedhjeve, ku do të ballafaqohen tabelat e rezultateve të 11 KZAZ-ve të Tiranës me procesverbalet e Qendrave të Votimit.
Vetëm pas ballafaqimit të tyre, i cili sikundër ka thënë kryekomisioneri i KQZ-së Arben Ristani kërkon 48 orë pas përfundimit të procesit të numërimit, kreu i KQZ-së pritet të shpallë kryebashkiakun e ri të Tiranës.
KQZ është mbledhur këtë pasdite për të marrë në shqyrtim edhe ankesat e partive për fletët e kontestuara në KZAZ-të e numërimit të votave në Tiranë.
Pas nisjes së mbledhjes përfaqësuesi i PS-së në KQZ, Genci Gjonçaj deklaroi se është e patolerueshme që KZAZ-ja nr. 49 nuk ka përfunduar nxjerrjen e rezultatit në tabelën e KZAZ-së.
Gjonçaj ngriti edhe shqetësimin se votat për kryebashkiakun të gjetura në kutinë e kryetarit të minibashkisë, pra në kutinë e gabuar, duhet të konsiderohen të pavlefshme dhe të mos rivlerësohen.
Sipas Gjonçaj mosnxjerrja e këtyre fletëve si pavlefshme shkon ndesh me ligjin, që sipas tij flet qartë për këtë fakt, dhe i cilëson ato fletë si të pavlefshme.
“Procesi për kryetar bashkie është i përfunduar”, ngulmoi Gjonçaj, duke i kërkuar kryetarit të KQZ-së Arben Ristani që të përfundojë sa më parë shpalljen e fituesit të garës elektorale për bashkinë e Tiranës.
Ndërkohë në KQZ po debatohet për fletët e kontestuara, të cilat sikundër dihet janë fletët e votimit për kryebashkiakun të gjetura në kutinë e kryetarit të minibashkisë, në disa njësi në kryeqytet.
Përfaqësuesit e PD-së kërkojnë që këto fletë të kontestuara të lexohen, ndërsa përfaqësuesit socialistë kërkojnë që këto vota të nxirren të pavlefshme.
mit/NOA
