Tiranë, 15 maj 2011, NOA – Ashtu si mbrëmjen e të shtunës kur gjatë procesit të numërimit të votave për kryetarin e minibashkisë 7, u gjetën në kuti, 8 fletë votimi për kryebashkiakun e Tiranës, edhe pranë njësisë 5, apo në KZAZ-në 49, u gjet një tjetër fletë votimi për kryebashkiakun, që i adresonte votën kandidatit të “Aleancës për Qytetarin” Lulzim Basha.
Kjo votë ishte futur gabimisht nga votuesi në kutinë e kryetarit të njësisë bashkiake nr. 5.
Në njësinë nr. 5 garon Jeta Seitaj për “Aleancën për të Ardhmen” dhe Erisa Xhixho e LSI-së për “Aleancën për Qytetarin”.
Gjetja e vetëm një flete votimi në favor të Lulzim Bashës ka ngjallur debate mes komisionerëve të KZAZ-së.
Komisionerët e PD-së kanë ngulmuar që këtë fletë votimi të mos e quajnë të pavlefshme, por komisionerët e majtë nuk kanë rënë dakort, ashtu si edhe mbrëmjen e djeshme, duke kërkuar që sipas ligjit, fleta e hedhur gabimisht jo në kutinë e duhur, duhet konsideruar si fletë votimi e pavlefshme, edhe pse votimi aty është tërësisht i vlefshëm.
Komisionerët demokratë kërkojnë që kjo fletë votimi ashtu si edhe të tjerat të gjetura të shtunën, të lexohen nga KQZ, dhe të vendosë pikërisht ky institucion për vlefshmërinë apo pavlefshmërinë e tyre.
mit/NOA
