E hënë, 16 maj 2011, NOA- Pas ndërprerjes prej disa kohës, gjatë ditës së nesërme dhe asaj të pasnesërme, në Bruksel do të mbahet raundi i katërt i dialogut teknik midis Kosovës dhe Serbisë.
Siç bëhet e ditur nga qeveria e Kosovës, në qendër të këtij raundi të dialogut do të jenë vazhdimi i bisedimeve për temat në axhendë të raundeve të kaluara, regjistrat civile dhe kadastralë, telekomunikacioni, energjia, vulat doganore, liria e lëvizjes dhe diplomat shkollore. Gjithashtu në takimet e datës 17 dhe 18 do të hapen edhe dy tema të reja, ajo e trashëgimisë kulturore dhe zbardhja e fatit të të zhdukurve gjatë luftës.
Theksohet se ashtu si në tre raundet e kaluara të dialogut teknik, delegacioni i Republikës së Kosovës do ta shpalos dhe mbrojë qëndrimet e veta të cilat janë në harmoni me Kushtetutën, ligjet, rezolutën e Kuvendit të Republikës së Kosovës, si dhe Platformën e Qeverisë së Republikës së Kosovës mbi dialogun teknik midis Republikës së Kosovës dhe Serbisë.
Delegacioni i Kosovës kryesohet nga zëvendëskryeministrja Edita Tahiri.
a.y/NOA
