Tiranë, 21 maj 2011, NOA - Kryetari i Partisë Socialiste, Edi Rama deklaroi sonte se nëse kryeministri Sali Berisha nuk tërhiqet nga vendimi për të ndryshuar rezultatin në Tiranë, protestat e opozitës do të përhapen në gjithë vendin dhe do të kërkojnë largimin e qeverisë.
“Rezistenca qytetare do të përhapet në të gjithë Shqipërinë, qytetarët do të thirren për largimin përfundimtar të qeverisë, e gjitha kjo do të jetë pasojë e natyrshme e vjedhjes për ditën në diell të votës së shqiptarëve”, tha kreu i PS-së në deklaratën e dhënë pak minuta më parë nga selia rozë.
Kryetari i Partisë Socialiste ju referuar deklaratës së dhënë paraditen e sotme nga kryeministrit.
Ai u shpreh se kryeministri Sali Berisha “bën sikur nuk i dëgjon zërat e qytetarëve” dhe “sikur nuk i sheh raportin e ODIHR”.
Kryesocialisti Rama shtoi se mazhoranca nuk “mund të kthejë humbjen në Tiranë, në një fitore më pahir”.
Kreu i opozitës u shpreh se askush nuk mund të luaj me fuqinë e këtij populli. “Kjo krizë është një apel kumbues për ne dhe ne do t’i përgjigjemi me fuqinë e popullit shqiptar”, tha Rama.
e.t/NOA
