Tiranë, 22 maj 2011, NOA- Kryetari i Lëvizjes Socialiste për Integrim i Tiranës, Shezai Rrokaj nga selia e kësaj partie deklaroi se, në zgjedhjet e 8 majit, numri i votuesve të LSI-së në kryeqytet është 70 % më i lartë se ai i vitit 2009.
Sipas tij, në këto zgjedhje Lëvizja Socialiste për Integrim arriti një fitore spektakolare, me 20.814 votues për Këshillin e Bashkiak të Tiranës, dhe 23.012 për Këshillat e Minibashkive.
Ai theksoi se në kryeqytet kjo parti fitoi dy minibashki, atë numër 2 me kryetar Elez Gjozën dhe minibashkinë numër 3 me kryetar Ilir Kokonën.
Sakaq ai shtoi se nga këto zgjedhje priten të certifikohen 5 këshilltarë për Bashkinë e Tiranës dhe rreth 35 këshilltarë për minibashkitë, ku më shumë se 12 prej tyre janë femra.
Rrokaj shtoi se, LSI-ja e Tiranës dha një kontribut të vyer për fitoren e 2 minibashkive, si dhe për fitoren e 7 minibashkive brenda Aleancës për Qytetarin.
Ndër të tjera kreu i LSI-së për Tiranën u shpreh se, vota e sovranit duhet të jetësohet nëpërmjet certifikimit, ndaj inkurajoi të gjitha institucionet që të kryejnë detyrën e tyre kushtetuese për të ligjëruar sa më shpejt vullnetin e sovranit .
Gjatë fjalës së tij Rrokaj falënderoi qytetarët, numëruesit, komisionerët dhe vëzhguesit për kryerjen me sukses të punës së tyre, duke veçuar qytetarët e Tiranës, që sipas tij, pavarësisht nga bindjet politike, në 8 maj morën pjesë në zgjedhje duke dëshmuar vlera qytetare të një demokracie funksionale.
a.y/NOA
