Tiranë, 23 maj NOA - Komiteti Shqiptar i Helsinkit (KShH), me anë të një deklaratë kërkon nga policia dhe organet kompetente të jetë më e kujdesshme në respektimin e ligjit në lidhje me ndalimin dhe shoqërimin e perosnave që marrin pejsë në tubimet politike.
KSHH vren "se nëpërmjet medias të datës 11 Maj 2011, dhe pamjeve filmike televizive, u informua se vëllezërit Urim dhe Shpëtim Marku në datën 20 Maj 2011, ishin keqtrajtuar nga punonjësit e policisë".
Sipas KSHH, “ngjarja ka ndodhur në Bulevardin “Zogu i I”, në afërsi të Ministrisë së Drejtësisë, mbasi personat e mësipërm ishin kthyer nga tubimi i organizuar para selisë të Komisionit Qendror të Zgjedhjeve. Ata u kapën kur po dilnin nga farmacia. Qysh në këtë moment, ndaj tyre u ushtrua dhunë. U shoqëruan në ambientet e komisariatit të policisë dhe dhuna vazhdoi edhe brenda ambienteve të saj, aq sa vetë organet e policisë shoqëruan dhe i shtruan ata në Spitalin Ushtarak”, thuhet në njoftimin e KSHH-së.
Më tej, KShH deklaron se nëpërmjet shtypit u informua “gjithashtu se organet përkatëse janë duke hetuar edhe ankesën e të dëmtuarve, se ndaj tyre është ushtruar dhunë në atë masë sa u pa e nevojshme që këto organe t’i shtronin në spital”.
“KShH mendon se organet përkatëse duhet të reflektojnë për të dhënat ekzistuese që paraqiten në raportin e sipërpërmendur. Ndërsa për rastin konkret, KSHH mendon dhe shpreson për një hetim të shpejtë, transparent dhe të paanshëm”, thuhet në deklaratën e KSHH-së duke i cilësuar raste të tilla si të përsëritura.
a.k.NOA
