Tiranë, 23 maj 2011, NOA Update – Shefi i mazhorancës Sali Berisha deklaroi para pak minutash se pas 11 vitesh Tirana u kthye në blu. Duke iu referuar fitores së kandidatëve të “Aleancës për Qytetarin” në shtatë minibashki të kryeqytetit, nga 11 të tilla, kreu i Partisë Demokratike deklaroi se zgjedhjet vendore të 8 majit janë një fitore historike e koalicionit të mazhorancës.
“Kemi marrë shtatë nga 11 minibashki të Tiranës dhe kjo është një arritje e madhe dhe një besim i qytetarëve për këtë koalicion”, tha kryeministri.
Sipas kryeministrit fitorja e 8 majit është simotër me fitoren e PD-së në zgjedhjet e vitit 1992, të parat zgjedhje demokratike dhe pluraliste të zhvilluara në Shqipërinë post-komuniste.
Kryeministri gjatë mbledhjes së grupit të demokratëve akuzoi kryetarin e Partisë Socialiste dhe kandidatin për të katërtin mandat për bashkinë e Tiranës, Edi Rama se bëri çdo gjë për dezinformuar qytetarët për procesin e numërimit të fletëve të kontestuara në KQZ.
“Rama bëri gjithçka që të dezinformojë shqiptarët, pasi në ligjin e ri elektoral i miratuar me konsensus të plotë dhe me kërkesë të PS-së, KZAZ për Tiranën është parashikuar KQZ-ja”, bëri me dije kryeministri duke marrë në mbrojtje Komisionin Qendror të Zgjedhjeve.
Sipas kryeministrit, KQZ me numërimin e votave të kontestuara kreu vetëm detyrën e tij në zbatim të ligjit dhe Kodit Zgjedhor.
Lidhur me akuzat për ndryshimin e rezultatit, Berisha i bëri thirrje kreut të opozitës që t’i drejtohet Prokurorisë dhe të kërkojë hapjen e zarfave për çdo njësi.
Kryeministri ripërsëriti se kontestimi i numërimit të votave nga Rama vjen pasi ky i fundit ka fobi nga vota.
Duke theksuar se me këto shifra Lulzim Basha është fitues i garës për Tiranën, kryeministri ripërsëriti se mazhoranca do të presë shpalljen e rezultatit përfundimtar të zgjedhjeve mandej do të shpallë fitoren.
Sakaq kryeministri rikujtoi se pas dy vjetësh janë zgjedhjet e përgjithshme parlamentare të vitit 2013, duke i bërë apel deputetëve të tij se “duhet të përgatitemi për garën e ardhshme elektorale. Në çdo metër katror të këtij vendi fitorja e vitit 2013 do të ndërtohet me thellimin e mëtejshëm të reformave ekonomike, reformave ligjore, luftës kundër korrupsionit”.
mit/NOA
