Tiranë, 26 maj 2011, NOA- Në vijim të vizitës së tij dy ditore, Ministri i Administrimit të Pushtetit Lokal, në Kosovës, Sllobodan Petroviç u prit në takim nga zv.Kryeministri dhe Ministri i Punëve të Jashtme, Edmond Haxhinasto.
Gjatë takimit të tyre, Haxhinasto theksoi mbështetjen e Shqipërisë për konsolidimin e statusit të pavarësisë së Kosovës dhe rritjen e numrit të njohjeve, duke u shprehur se pavarësia është jo vetëm një e drejtë e popullit të Kosovës, por dhe zgjidhja e vetme për
paqen, sigurinë dhe stabilitetin në Kosovë dhe në rajon.
Më tej ai nënvizoi se Shqipëria ka mbështetur dhe do të mbështesë integrimin e
Kosovës në të gjitha nismat rajonale. Integrimi është para së gjithash integrim i
njerëzve, për të përmirësuar cilësinë e jetës së tyre dhe jo integrim i territoreve.
Nga ana e tij, Petroviç vlerësoi qëndrimin e Shqipërisë për të ndërtuar ura bashkëpunimi në procesin integrues të komuniteteve në Kosovë, duke kontribuar konkretisht me një
fond prej 400 mijë euro, për ndërtimin e objekteve social-kulturore në komunën e re
të Graçanicës me shumicë serbe.
Sakaq ai shtoi se axhenda e përbashkët e dy vendeve është ajo e Bashkimit Europian dhe në bashkëpunim shtoi ai duhet punuar për të arritur të gjitha standardet e duhura.
Lidhur me çështjen e ndarjes së Kosovës, Petroviç theksoi se, ajo nuk është përkrahur as nga Brukseli dhe as Uashingtoni dhe, nga përvoja praktike shtoi ai të gjithë janë kundër këtyre ndarjeve.
a.y/NOA
