Tiranë, 30 maj 2011, NOA – Tabela përmbledhëse për kryebashkiakun e Tiranës dhe faktet e paraqitura në Komisionin Qendror të Zgjedhjeve për parregullsitë e vërejtura u bënë objekt debatesh në mbledhjen e sotme, duke bërë që KQZ ta shtyjë për nesër vendimin lidhur me ankesat e dy partive të mëdha, Partisë Socialiste dhe Partisë Demokratike.
KQZ vendosi të marrë si prova faktet e paraqitura mbi parregullsitë në qendrat e votimit, procesverbalet e grupeve të numërimit, librat e protokolleve.
Komisioni Qendror i Zgjedhjeve do të mblidhet nesër në orën 09:30 për të vendosur për dy ankesat e PS-së e PD-së.
PD kërkon rivlerësimin dhe rinumërimin e votave të kontestuara në katër njësi bashkiake të kryeqytetit dhe përfshirjen e tyre në tabelën përmbledhëse të rezultateve, një kërkesë kjo që u mbështet nga anëtarët e PD-së në KQZ.
Por, nënkryetarja e KQZ-së Dëshira Subashi, e cilësoi këtë kërkesë si të pakutimtë dhe taktikë për të marrë votën e kundërshtarit politik.
Ndërsa kërkesa e paraqitur në KQZ nga Partia Socialiste kërkon hedhjen poshtë të rezultatit të KZAZ-së nr. 49, që i përket njësisë bashkiake 5 dhe vendimin e KQZ-së për tabelën përmbledhëse të bashkisë së Tiranës.
mit/NOA
