Prishtinë, 30 maj 2011, NOA – Delegacioni i Kosovës do të bojkotojë dialogun mes Kosovës dhe Serbisë në rast se pala serbe do të tentojë të rihapë çështjen e ndarjes së Kosovës.
Këtë deklaratë e bëri sot ministri i Punëve të Brendshme të Kosovës, Bajram Rexhepi gjatë një takimi me studentët e Institutit për Studime Politike dhe Europiane (ISPE).
“Është shumë e qartë si nga Prishtina edhe nga faktorët ndërkombëtarë se çështja e ndarjes as që mund të vihet në tryezën e bisedimeve”, tha ministri Rexhepi.
Ai saktësoi se “Kosova në asnjë rast nuk do të hyjë në bisedime me Beogradin për çështje të tilla, nëse në tryezën e bisedimeve do të tentohet që të hapet kjo temë, është obligim i palës kosovare që të lëshojë tryezën e bisedimeve”.
Sipas ministrit Rexhepi ndarja e Kosovës është lajtmotivi i politikës zyrtare të Beogradit.
Ministri Rexhepi ritheksoi se bisedimet mes Prishtinës e beogradit janë tërësisht teknike, një dialog që sipas tij do t`i shërbejë qytetarëve të të dyja shteteve për lëvizjen e lirë, por edhe ç’tensionimin politik dhe përmirësimin e bashkëpunimit mes dy vendeve në rajon.
mit/NOA
