Këtë vit përpos emisioneve më të mira në kanalet kosovare kam vendosur të bëj një renditje të tillë edhe për emisionet më të mira në kanalet shqiptare. Renditja konsiston në bazë të vlerësimit tim personal duke llogaritur cilësinë e çdo episodi të shfaqur që nga shtatori deri në fundjavën e fundit të muajit maj, varësisht kur emisionet kanë qenë në program. Gjithashtu kam marrë parasysh edhe komentimet dhe vlerësimet që kam bërë në TV Kolumnën Ditore që është publikua çdo ditë pune (me përjashtim të pushimeve në Telekomanda.com).
Luan Morina
10. Big Brother – E shtunë
Padyshim që formatet e ngjashme me Big Brother kanë audiencë të madhe tek ne shqiptarët në përgjithësi. Ndoshta është e karakterit tonë që të kënaqemi me këto lloj formatesh, duke shikuar disa veta të cilët tërë ditën bëjnë gjëra të hijshme e të pahijshme në një shtëpi të mbyllur dhe në sy të mijëra shqiptarëve. Dikush ka pasur kanalet Big Brother në Digitalb apo Ipko dhe ka përcjell më shumë ngjarjen, por një numër shumë më i madh ka shikuar edicionin e të shtunës. Personalisht, nuk bëj pjesë në asnjërin prej dy grupeve të lartpërmendura. Pozita e 10të i takon vetëm për shkak të një audience aq të lartë, bazuar në fjalët dhe komentet e shikuesve, pa ndonjë mjet matës adekuat për audiencë.
9. Albanians Got Talent
Nëse shihni versionin britanik apo atë amerikan, apo ndoshta edhe atë turk e kroat, do të vëreni që versioni ynë debutues ishte i varfër për nga cilësia. Kuptohet që talentet nuk mund ti krijojnë producentët, por duhet të bëjnë një punë më të madhe për t’i kërkuar, më shumë audicione në më shumë vende. Dhe gjithashtu nevojitën juri e re, më pak poetike, dhe më pak e mërrolur. Në fakt është juria ajo që ka qenë e aftë për të prishur këtë spektakël. Në çdo koment të tij Armendi ka marr së paku 5 minuta kohë, nga të cilat 4 kanë qenë vargje poetike që s’kishin lidhje me atë çfarë ishte shfaqur, Altini mundohej të bëhej serioze, ndoshta duke provuar të imitoj Simonin, por dështonte në të gjitha aspektet, e solide ishte Rovena Dilo, që ishte në mes edhe për kah gjykimi, ishte një balancë ndërmjet Armendit dhe Altinit.
8. Dancing with the Stars
Pas një sezoni të parë që bëri shumë bujë, prisja shumë më tepër nga DWTSA, sidomos me ardhjen e Amit dhe Ermalit, dhe disa konkurrentë interesant. Nuk u dëshpërova. Emisioni akoma ka “vrimat” e veta, kryesorja është pjesa e tretë e jurisë me Arjan Çanin që s’ka lidhje me vallëzim. Absolutisht më shkatërroi nervat në episodin e fundit kur filloi të fliste për videon pa përmendur fare vallëzimin e Simones. Ilir Shaqiri është ekspert i kësaj lëmie dhe është ndoshta një lloj nënçmimi ta fusësh me një radhë me Arjanin. Ermali ka sjell pak më shumë komedi, gjallëri në emision, dhe gjithashtu edhe Ami që ndoshta akoma s’është adaptuar, por me kalimin e kohës besoj që do të arrij nivelin që kishte në Portokalli. Ajo çfarë nuk po më pëlqen nga ana e saj është përmendja e “Gold Room” e që për mrekulli shqip do të tingëllonte “Dhoma e artë”. Konkurrentët kanë qenë solid dhe ata që ngrehin shikuesit para televizionit, përzgjedhje shumë e mirë e producentëve.
7. E diell
E ndjeja si detyrim të fusja njërin nga programet e stërzgjatura të së dielës në këtë Top10. Dua të them pothuajse 15 orë ose më shumë programacion gjatë të dielës dhe të mos zë vend në këtë Top10 do të ishte, të them “e pavend”. Të dyja ndoshta bazohen në ato që shfaqen të dielave në kanalet italiane, por megjithatë kanë arritur në një mënyrë të mbijetojnë dhe të ofrojnë pak origjinalitet deri diku. E nëse duhet të zgjedh mes E Diela Shqiptare me Ardit Gjebrean dhe E Diell me Adi Krastan, atëherë unë do të shkoja me këtë të dytin. Ka patur një skuadër më të mirë, ka ofruar më shumë origjinalitet dhe kreativitet, dhe ma merr mendja që ka qenë më i pëlqyer nga publiku. Epo së paku mua më ka pëlqyer më shumë dhe besoj që meriton të vendoset para AGT dhe BB të Top Channel.
6. Gjeniu i vogël
Formati i emisionit ndoshta është ndër më të vjetrit në këtë Top10, dhe akoma po i mbijeton konkurrencës së madhe. Nuk është gjëja më e mirë në Klan, por të bëhemi të sinqertë që Klan ka goxha programacion cilësor. Vjen në një kohë pranvere dhe dedikohet tërë familjes, një mundësi për të parë televizor të gjithë së bashku, ashtu siç ndodh zakonisht të shtunave, por kësaj radhe me një dozë më të madhe dedikuar më të rinjve. Gjeniu… arrin të ofroj atë kënaqësinë që vështirë është të gjejmë këto kohë në TV, ofron mundësi suksesi për më të rinjtë që falë punës dhe angazhimit të arrijnë diçka të dobishme në jetë, ose së paku në adoleshencë. Realizimi i programit këtë vit ka qenë edhe më i mirë me Agron Llakajn kohë pas kohe në juri, dhe pjesën tjetër të jurisë që në krahasim me DWTSA (kam fjalën për Çanin) janë shumë më profesionist në atë që gjykojnë dhe kuptohet që gjykimet e tyre kanë një themel të fortë.
5. Exclusive
Në krahasim me programet tjera politike, nëse mund ta fus në atë rend, Exclusive ka një dallim dhe avantazh ta quaj superior. Përderisa emisione si Opinion, Top Story, Shqip, Debat me… e kanë patur vështirë t’u ikin ngjyrimeve politike Exclusive që është një format shumë më ndryshe se ato që përmenda dhe për këtë arsye zë vend në Top10, sjell diçka shumë më informuese, më të qartë dhe më interesante për shikuesit. Storie të veçanta, të vërteta, dhe shumë frytdhënëse për intelektin tonë janë shfaqur në këtë emision gjatë këtij sezoni, e ndër të tjera dua të përmend tregimin e përgatitur për Lekë Dukagjinin. Ka qenë diçka e realizuar në një mënyrë të shkëlqyeshme, e që të gjithëve na ka ofruar shumë më tepër njohuri se ato që kemi mësuar në librat e shkollës. Exclusive zë vend në Top 5 programet më të mira për sezonin e kaluar të shfaqura në kanalet shqiptare.
4. Portokalli
Padyshim që ky është sezoni më i rëndë në historinë e Portokallisë. Humbën themelin, bërthamën e emisionit, Agron Llakajn që pos moderimit fantastik kishte edhe një mori rolesh tepër komike. Pas tij erdhi edhe ikja e Amarda Toskas, ndër moderatorët më të mira në tregun shqiptar. Megjithatë shumica e aktorëve mbeten, dhe disi arritën të përballojnë ato goditje. Patën disa episode interesante, dhe mos të harrojmë aty janë akoma disa nga “veteranët” që përbëjnë themelin e emisionit dhe të cilët akoma kanë një kontribut të veçantë dhe një dashuri nga teleshikuesit që akoma preferojnë ti shohin ata. Kam parë disa episode, jo shumicën, dhe ka pasur skeqe që më kanë pëlqyer, kanë qenë të mira, por ja në episodin e fundit ndodhi që pashë edhe njërin që provonte të emitonte z.Sali Berisha, e që nuk ishte aspak afër asaj që bënte Agron Llakaj. Një porosi për Portokallinë do të ishte që mos të provojnë të zëvendësojnë Agron Llakajn, sepse vetëm do të sjellin dëshpërim për shikuesit dhe humbje audience dhe sepse kjo është humbje kohe pasi Gonin s’mund ta zëvendësojnë, por le të provojnë të krijojnë diçka të re që do të ngrehte audiencën.
3. Milioneri
Kam dëgjuar disa thashetheme televizive se kinse Grand Media përdor një rotacion në përzgjedhjen e moderatorëve të Milionerit, por nëse vërtetë ekziston diçka e tillë, atëherë kjo duhet të merr fund me Agron Llakajn. Dhe kur flas për Agron Llakajn e kam përnjëmend për Regis Philbin (moderatorin amerikan me prejardhje shqiptare) shqiptar që ka bërë revolucion jo vetëm në Milioneri, por në përgjithësi në televizionin shqipfolës. Me ardhjen e Llakajt dhe kalimin e Milionerit në Klan TV, Shqipëria më në fund u bë vërtetë me Milionerin. Periudha e transmetimit në Alsat duhet të pranoj që ishte jo kushedi sa e lavdërueshme, dhe as aq e shikuar besoj. Por, që nga ky vit me Agron Llakajn dhe transmetimin në Klan TV, Milioneri ka penetruar në mënyrë të shkëlqyeshme tregun shqiptar. Tani kemi më shumë “televizion shqiptar” në Milioner, pa ofenduar dy moderator paraardhës, por Goni shton atë shijen e komedisë dhe është shumë më miqësor dhe më i lirë në udhëheqjen e emisionit, kemi një publik më aktiv që bën edhe garuesin të ndjehet më i qetë dhe më i lirë në karrige që s’besoj se është aq e “freskët”. Milioneri në Klan TV, renditet në pozitën e tretë në listën e 10 programeve më të mira shqiptare në sezonin e kaluar televiziv.
2. Këngët e shekullit
Ah si më kujtohen ato mbrëmje! S’ishte zgjedhje e lehtë shumë herë, në mes të Këngëve të shekullit dhe ndonjë ndeshje futbolli. Megjithatë sakrifica duhej të bëhej shpeshherë, të heqja dorë nga futbolli për të parë Këngët e Shekullit. E di që emisioni zakonisht ngre më shumë audiencë që është më në moshë, por për mua është emisioni më i dytë më mirë në kanalet shqiptare që kam parë këtë sezone që posa përfundoi. Këngët e vjetra qytetare, më e mirë e kulturës tonë nga çdo rreth ku flitet shqipja, s’dua të bëhem “patriot” me ato fjalë por nëse nuk di diçka më shumë për popullin tim, atëherë jam i bindur që di më shumë së paku për muzikën e atyre regjioneve. Ka patur shumë net të veçanta, të hareshme, të shkëlqyeshme, por nëse duhet ta veçoj ndonjërën, atëherë padyshim që do të ishte ajo me Rosela Gjylbegun, dhe ajo me legjendën Ismet Peja. Këngët e Shekullit kanë dominuar të shtunat në televizorin tim, por jam më se i bindur që e njëjta ka ndodhur edhe në televizionin tuaj.
1. Apartamenti 2XL
Padyshim zgjedhja e parë të dielave dhe më vjen shumë mirë që nuk ndeshet drejtpërdrejt me Këngët e shekullit. Ka qenë dominues në skemën time të dielave duke qenë zgjedhja ime e parë para Portokallisë, e edhe para shumë ndeshjeve të rëndësishme futbollistike. Dy episodet që kanë përmbyllur pjesën vjeshtore dhe atë pranverore kanë qenë ndër më të mirat, por pjesa vjeshtore në përgjithësi, jo vetëm finalja ka qenë më cilësore. E cilësia nuk ka munguar as në pranverë. Ka qenë humor i shkëlqyeshëm nga një skuadër fantastike. Ndoshta formati mund të mos jetë origjinal, por mënyra se si e bëjnë ata në 2XL është origjinale, është e mahnitshme. Ka qenë emisioni që ka mbushur skemën e të dielës, ka përmbyllur një fundjavë, dhe të ka dhënë energjinë e mjaftueshme për të mbijetuar një javë të stërngarkuar me punë. Pra, Apartamenti 2XL është emisioni më i mirë në kanalet shqiptare për sezonin e kaluar televiziv 2010/2011 sipas mendimit tim personal, e jam i sigurt që qindra mijëra qëndrojnë pas këtij mendimi.
Shënim: Vlerësimi mbi programet Tv është i artikullshkruesit
