Laç, 13 qershor 2011, NOA – Kisha e njohur e Shën'a Ndout në Laç është bërë nga mbrëmë epiqendra e pelegrinazhit të besimtarëve nga e gjithë Shqipëria.
Besimtarët përkujtojnë sot në 13 qershor vdekjen e shenjtorit 7 shekuj më parë.
Mijëra besimtarë janë ngjitur në majën e kodrës ku ndodhet vendi i shenjtë, duke ndjekur rrugën që ndoqi këmbëzbathur shenjti Shën’a Ndou deri në shpellën e Shën Vlashit.
Gjatë këtij pelegrinazhi këmbëzbathur besimtarët kanë ndezur qirinj, kanë lënë objekte personale në kërkim të mirësive dhe janë lutur për të dashurit e tyre e për sa më shumë mirësi në familje.
Besimtarët, të cilët e ndjekin këtë ritual prej shumë vitesh shprehen se ata besojnë tek ky vend i shenjtë.
Sipas besimtarëve kisha e Shën’a Ndout u ka bërë mrekulli të mëdha njerëzve, andaj edhe lutjet e tyre në këtë pelegrinazh janë lutje për paqe, dashuri e begati në familje.
Gjatë paradites besimtarët morën pjesë edhe në meshën tradicionale, që përmbyll pelegrinazhin e 13 të martave të Shën’a Ndout.
Marshimi i pelegrinëve drejt kishës së Laçit është mbikqyrur nga forcat e policisë, të cilat kanë siguruar mbarëvajtjen e aktivitetit.
Pelegrinazhi në kishën e shenjtë të Shën’a Ndout mbledh çdo vit rreth 1 milionë besimtarë nga i gjithë vendi, duke bërë që çdo 13 qershor qyteti i vogël i Laçit të mbipopullohet nga besimtarët.
mit/NOA
