Tiranë, 14 Qershor 2011 NOA Ervin Tirana – Update – Vrasje me armë zjarri ka ndodhur mbrëmjen e së hënës në zonën e ish-Bllokut në Tiranë duke shkaktuar panik mes njerëzve që ndodheshin në lokal dhe qytetarëve të shumtë që lëvizin në rrugën ku ndodhi incidenti.
Ngjarja ka ndodhur në zonën e ish-Bllokut, në lokalin “Baroque”, te rruga “Ismail Qemali”, pranë kryqëzimit, ngjitur me bankën BKT në zonën e ish-bllokut, Tiranë.
Burime në vendngjarje i thanë agjencisë NOA se se me armë zjarri është qëlluar pranë lokalit, në drejtim të tre të rinjve duke i plagosur. Një prej tyre, Nadien Zeneli, 32 vjeç nga Dibra, ka mbetur i vdekur kurse dy të tjerët të plagosur.
Të plagosurit janë Bledar Miho, 25 vjeç nga Dibra dhe Tafe Mandri, 23 vjeçar, gjithashtu nga Dibra.
Policia konfirmoi për agjencinë e lajmeve NOA se të tre të plagosurit janë dërguar menjëherë në Spitalin Ushtarak, por nga plagët e marra ka vdekur Nadien Zeneli.
Në vendngjarje bashkëpunëtori i agjencisë NOA raportoi se situata u bë e nderë gjatë minutave të pas incidentit, pasi njerëzit u frikësuan nga plumbat e qitura me pistoletë duke u përpjekur të ruhen përmes uljes poshtë tavolinave apo vrapimit për të shmangur qëndrimin në zonën e rrezikuar.
Policia tha se një person ka qëlluar pranë lokalit duke kryer vrasjen. Mësohet se i dyshuari i vetëm i masakrës ka hyrë në lokal, i është drejtuar tavolinës ku gjendeshin tre djemtë dibranë dhe ka hapur zjarr në drejtim të tyre duke i plagosur që të tre.
Menjëherë më pas është zhdukur në drejtim të paditur duke vrapuar nëpër rrugët e ish-Bllokut.
a.e/NOA
