Intervista/Kryetari i Lëvizjes Socialiste për Integrim flet për aktualitetin politik. Siguron se “pavarësisht nga dëshira që kemi do të respektojmë çdo rezultat përfundimtar që do të dalë nga i gjithë ky proces i jashtëzakonshëm dhe transparent”. Në intervistën dhënë sonte për televizionin “ABC News”, të cilën e gjeni të zbardhur të plotë më poshtë, z.Meta ndalet edhe në klimëm e acaruar politike duke shigjetuar opozitën socialiste
Z. Meta, si e konsideroni vendimin e fundit të Kolegjit Zgjedhor që konsiston në numërimin e votave të tjera me një procedurë transparente në ta gjitha kutitë e Tiranës?
Natyrisht që ne do të kishim dashur që kjo garë të kishte përfunduar dhe natyrisht që ky ishte një opsion i pritshëm por fakti që Kolegji ka marrë këtë vendim, pavarësisht nga koha që përsëri merret për përcaktimin e fituesit, mendoj që duhet respektuar. Në fund të fundit Kolegji me këtë vendim ka vendosur një standard vërtet të paparë të transparencës në Shqipëri i cili natyrisht nuk është shumë i mirëpritur në drejtim të kohës dhe të zgjatjes përtej gjithë parashikimeve por në fund të fundit është i imponuar. Pra kjo transparence maksimale, e pa ndodhur më parë është e imponuar nga rezultati i paparashikuar, tepër i ngushtë gjë që do të thotë se në kutitë e tjera ndoshta mund të ketë vota të tjera, të quajtura të gabuara, të cilat do të duhet të vlerësohen përsëri. Ne, pavarësisht nga dëshira që kemi do të respektojmë çdo rezultat përfundimtar që do të dalë nga i gjithë ky proces i jashtëzakonshëm dhe transparent.
Por PS ka një pretendim që në kërkesën e saj nuk ka qenë i përfshirë çështja e shtrirjes së numërimit në të gjitha kutitë. Madje sipas Kolegji Zgjedhor e ka shtrirë jashtë-ligjshmërinë nga 117 qendra edhe në 368 të tjerat. Si mendoni?
Ndoshta edhe vetë gjendja emocionale e lidershipit të opozitës çon në deklarata të tilla të cilat janë në opozitë me të vërtetën dhe me ligjin dhe së dyti të cilat janë thellësisht kontradiktore me të gjithë “kauzën” e transparencës së kutive të kërkuar për dy vite me radhë pas zgjedhjeve së 28 qershorit 2009. Pra lidershipi i Partisë Socialiste pas 28 qershorit duke mos u pajtuar me rezultatin, edhe pse ky rezultat ishte i pakontestuar asgjëkund në Shqipëri nga përfaqësuesit e saj, edhe pse ky rezultat ishte i certifikuar nga gjykatat, përsëri insistonte për tu hapur kutitë sepse, sipas saj, kishte dyshime, por jo fakte apo prova, se mund të kishte vota të caktuara në favor të saj e kështu me radhë. Ndërsa tani procesi nuk ka përfunduar sepse procesi përfundon kur kemi aktin përfundimtar të certifikimit të KQZ-së, pas përfundimit të konsumimit të të gjitha ankimeve, dhe kur tanimë që është e qartë që ka vota të cilat janë hedhur pa dashje në kutitë që nuk kanë qenë për kryetarin e Bashkisë, edhe unë personalisht mund t’ju them që kam qenë duke i ngatërruar, edhe KQZ-ja duke të nxjerrë një mësim. Unë jam orientuar nga një zonjë që ishte aty sepse duhet të hapje fletën, që në një farë mënyre mund tog tregojë dhe votën, jo e imja se ajo dihet por të qytetarëve të tjerë, për ta parë ngjyrat të cilat ishin shumë të zbehta. Shumë qytetarë e kanë bërë këtë gabim që nuk është për fajin e tyre.
Për përsa i përket pretendimeve të PS-së që një gjë e tille mund të jetë bërë edhe me qëllim për arsye presioni?
Mendoj se këto janë gjepura pasi dihet se kur një fletë votimi është e vlefshme sipas Kodit që ka bërë vetë Partia Socialiste. Ky rast nuk përfshihet përkundrazi dhe në këtë drejtim mendoj se ky ka qenë një proces tërësisht transparent dhe habitem se pse Partia Socialiste e kundërshton hapjen e kutive për të gjitha rastet pasi ndoshta mund të ketë edhe shumë fletë të tjera në favor të z. Rama. Atëherë do të ishte gabim shumë i madh të paragjykoje një proces i cili nuk dihet se çfarë do të sjellë. Janë hapur 117 kuti, të cilat janë kërkuar dhe janë njoftuar por janë edhe një mijë e ca të tjera të cilat do të hapen dhe këto mund të nxjerrin fitues z. Rama. Natyrisht unë nuk besoj.
Socialistët këmbëngulin për të pasur një institucion jashtë kufijve, këshillimor, si Komisioni i Venecias, i cili të mund të jepje një ide mbi këtë procedurë të ndjekur nga KQZ. Si mendoni?
Nuk ka institucion në botë që mund të interferojë në një proces gjykimi nga ana e gjykatave shqiptare. Për shkak të Kushtetutës së republikës së Shqipërisë e cila për fat të mirë është bërë me ekspertizën e Komisionit të Venecias. Roli i këtij komisioni i cili natyrisht është i mirëpritur edhe për reformën zgjedhore, do të ishte shumë i dobishëm në momentin që do të kishte një reformë zgjedhore për të saktësuar shumë çështje të cilat kanë qenë të paqarta por që nuk mund të thuhet që janë të paligjshme si në rastin konkret. Në këtë drejtim natyrisht Komisioni i Venecias mendoj që është shumë i mirëpritur sikurse dhe roli i OSBE-ODIHR-it.
Prisni që në raportin e ardhshëm të OSBE-ODIHR-it, të ketë ndonjë dyshim në lidhje me aftësinë e sistemit tonë të drejtësisë për të dhënë drejtësi në këtë rast?
Duhet të kemi parasysh se deklaratat politike jepen edhe sipas interesave apo këndvështrimeve politike sepse është e vërtetë që z. Stonestreet, kreu i vëzhguesve të OSBE_ODIHR-it, u shpreh që baza ishte e paqartë dhe natyrisht që mund të themi që ishte e tillë për arsye se nuk ishte e precizuar në mënyrë të qartë se si do të veprohej në një rast të tillë, sepse vetë situata ishte e tillë, dhe të mos harrojmë se çfarë deklaroi në Kongresin Amerikan, në Komitetin e Helsinkit, ku tha se ky rezultat kaq i ngushtë në Tiranë do të ishte shumë i vështirë për tu menaxhuar në çdo administratë zgjedhore. Mos harrojmë njëkohësisht se si u shpreh Ndihmës Sekretari Kantrimen për këtë rast që vërtet ekziston shqetësimi që kjo është e paqartë por tha që kjo nuk do të thotë që është e paligjshme. Nuk e kishte parashikuar Kodi sepse nuk ka ndodhur ndonjëherë që një rezultat ku votojnë 250 mijë votues të ndahet për kaq vota. Në qoftë se diferenca do të kishte qenë 1000 vota në favor të njërit kandidat edhe pala tjetër nuk do të kishte kërkuar këtë dhe mund të mos ishte marrë. Pra, në një farë mënyre mendoj se kjo ishte një prove për demokracinë, për institucionet e vendit tonë dhe jam i bindur që kjo do të kalojë me sukses, pavarësisht se si do të dalë rezultati. Në vend që socialistët ta përshëndesin këtë vendim sepse në fund të fundit i hap rrugën një transparencë maksimale, të plotë e cila mund të nxjerrë fitues dhe z. Rama, gjë që unë nuk e dëshiroj sepse jam i bindur që Tirana ka nevojë për ndryshim. Do të thosha që ka një nxitim i cili është tërësisht i pajustifikuar. Ka një dëshirë për të kontestuar çdo gjë.
Z. Meta forca juaj politike ka arritur të ketë në zgjedhjet e 8 majit, një rezultat shumë të mirë dhe një rritje të ndjeshme e cila e ka nxjerrë edhe një herë forcë përcaktuese. Si e shpjegoni këtë rezultat dhe këtë rritje në zgjedhjet e 8 majit për LSI-në?
Unë kam qenë në këtë studio edhe pak ditë më përpara ditës së zgjedhjeve. Unë kam qenë shumë i qetë dhe shumë i sigurt që këto zgjedhje do të konfirmon një rritje të padiskutueshme për Lëvizjen Socialiste për Integrim dhe tashmë është bërë e qartë se kjo forcë politikë është tepër e qëndrueshme e cila vjen në rritje dhe e cila ka një identitet mjaft të qartë që nuk e humbet as kur bën koalicion me PS-në, as kur bën koalicion me PD-në dhe aq më tepër kur ka qenë e vetme dhe ka dhënë disa prova duke qenë pak a shumë në të njëjtën peshë elektorale dhe në të njëjtin nivel përfaqësimi.
Çfarë elektorati ju ka votuar këtë herë, majtas apo djathtas, nga ju janë shtuar votat?
Natyrisht që ne jemi një forcë e qendrës së majtë por mbi të gjitha elektorati ynë është progresist. Është një elektorat i cili kërkon stabilitetin e vendit, kërkon progresin e vendit dhe që nuk i shikon çështjet vetëm bardh e zi. Pra kemi një elektorat të arsyeshëm dhe të logjikshëm.
Si shpjegohet që ngjarjet që ndodhën në forcën tuaj politike para zgjedhjeve nuk janë përftuar nga votuesit?
Sepse i gjithë opinioni publik, pavarësisht nga një tronditje apo nga një perceptim i caktuar, për shkak të një skenari regjisorial të mirë menduar të lidershipit socialist duke shfrytëzuar një ekran të rëndësishëm në vendin tonë, natyrisht që në momentin e parë pati një reagim të caktuar por shumë shpejt u kuptua që e gjithë kjo ishte një lojë politike, se e gjitha ajo kasetë që është parë ishte një montazh. Mund t’ju them që ekspertiza ndërkombëtare e konfirmuar këtë në mënyrë shumë të qartë dhe ekspertiza e dytë ndërkombëtare e cila tashmë ka përfunduar e bërë nga një nga ekspertët më të mirë të Evropës, do të konfirmojë këtë gjë, e cila do të konfirmohet edhe në procesin gjyqësor. Pra, mendoj se qytetarët e kanë kuptuar edhe pa parë procesin e gjykimit, që e gjitha ajo ka qenë një farsë që bëhej në mënyrë të pandershme, thjesht për goditje politike dhe për të justifikuar veprime destruktive. Kështu që natyrisht kjo nuk ka pasur asnjë efekt, për sa i takon çështjes së votës.
Disa nga analistët e kanë njohur votën tuaj shumë të mirë politike por kanë deklaruar se kandidatët e forcës suaj politike nuk kanë arritur të fitojnë në të shumtën e rasteve. Ata thonë se ju keni përfituar nga rezervuari i votave të përbashkëta të koalicionit për të ngritur lart prestigjin tuaj. Si do t’i përgjigjeshit në këtë rast?
Kjo është tërësisht e pavërtetë. Së pari, pavarësisht se koalicioni “Aleanca për Qytetarin’, është fitues në disa komponentë madhorë të këtyre zgjedhjeve, përshembull për numrin total të Njësive Vendore, apo numrit të votave popullore të cilat janë politike. Për sa i takon kësaj tjetrës, ne nuk na ka falur vota askush, përkundrazi. Tjetra që mund të them është se ne nuk jemi shumë të kënaqur me këtë rezultat, kemi pritur një rezultat akoma më të lartë por mund t’ju them se pasja e disa kandidatëve nga ana jonë në disa qytete të rëndësishme na ka penguar për të bërë një fushatë për votat për partinë. Ndërsa për çështjen e mazhoritarit do të thosha që një nga analizat që do të bëjë ky koalicion , dhe këtë ia kam shprehur edhe kryetarit të PD-së z. Berisha është pikërisht analiza e këtyre zgjedhjeve. Ne si LSI-së jemi duke e bërë çdo ditë në të gjithë vendin sepse natyrisht që nuk është e justifikueshme që për sa i takon rezultatit të shumë Njësive Vendore të mos arrihej fitorja. Ashtu sikurse edhe Tirana e cila për mua do të fitohet sepse është fituar edhe Këshilli, janë fituar edhe 7 Njësi Bashkiake me 4, do të duhej të ishte një rezultat edhe më i mirë sepse edhe kandidati i “Aleanca për Qytetarin” e udhëhoqi gjithë këtë fushatë, nga minuta e parë e shfaqjes së tij si kandidat për Kryetar Bashkie dhe vazhdon ta udhëheqë edhe sot me qytetarinë e tij në reagimin në çdo hap të këtij procesi që po vazhdon. Ne jemi të gatshëm të marrim edhe përgjegjësitë tona në raport me partnerët e tjerë të koalicionit por mendoj se duhet parë më mirë koordinimi dhe funksionimi i koalicionit në bazë.
Si po shkon koalicioni, ku kam parasysh këtu edhe qëndrimin tuaj të fundit në Parlament në lidhje me emrat e Presidentit për Gjykatën e Lartë?
Nuk është hera e parë. Edhe në rastet e kaluara, ne kemi votuar për kandidatët të paraqitur për anëtarë të Gjykatës, sikurse ishte rasti i z. Çomo, kanë qenë edhe raste të tjera si ai djeshëm. Ne kemi mendimin tonë, dekretet janë individuale dhe ne mendojmë se këto nuk duhet të kthehen në çështje politike apo të politizohen qëndrimet. Edhe fakti që deputetët votojnë nominalisht do të thotë që në votimin e tyre ata duhet të jenë sa më të pavarur.
Duke qëndruar te çështja e koalicionit, me riformatimet e mundshme që do të ketë qeveria duke pasur parasysh vendet e mbetura bosh, a e shihni veten pjesë e kabinetit të ardhshëm qeveritar dhe si do të jetë pozicionimi i LSI-së në kabinetin e ardhshëm?
Mendoj se kjo nuk është një çështje e rëndësishme. Për mua e rëndësishme është që qeverisja të jetë edhe më efikase dhe padyshim është e rëndësishme që ky bashkëpunim të jetë më rezultativ në aspektin programor dhe mbi të gjitha forcimi mëtejshëm i LSI-së është prioritet i imi numër një dhe të gjithë këtë periudhë verore unë do ta shfrytëzoj duke u takuar në gjithë Shqipërinë me të gjitha strukturat e LSI-së. Jo vetëm unë por edhe me drejtues të tjerë të LSI-së, pasi e thashë edhe një herë që nuk jemi edhe shumë të kënaqur nga ky rezultat pavarësisht se në përgjithësi në opinionin publik pati një impakt të tillë. Kishim objektiva edhe më të larta se kaq. Por tani ne kemi një model të shkëlqyer, që është modeli i LSI-së së Tiranës, që është një model perfekt, i cili do të jetë model për të gjithë Shqipërinë në zgjedhjet e ardhshme. Çdo forcë serioze politike sapo përfundon një garë elektorale, mendon për garën e ardhshme. Është si puna e ekipeve te futbollit sapo mbaron një ndeshje fillon e mendon për ndeshjen e radhës. Këto zgjedhje përfaqësojnë një stacion, ne tani shohim drejt stacionit tjetër.
Jeni forca e tretë politike në vend dhe këto zgjedhje treguan se ishit një forcë përcaktuese veçanërisht në Tiranë. Si e shihni këtë rol të LSI-së, përkundrejt jo vetëm sjelljes ndaj mazhorancës dhe PS-së, por fakti që jeni përballë dy forcave që janë me qëndrime krejtësisht radikale dhe shumë të polarizuara me njëra-tjetrën?
Mendoj se nuk mund të vëmë shenjën e barazimit, jo sepse ne jemi në koalicion me Partinë Demokratike, por për arsye se në përgjithësi i gjithë ky konflikt i stisur politik në vend vjen për shkak të një refraktariteti të pashembullt nga ana e lidershipit të Partisë Socialiste i cili kërkon të justifikojë vazhdimisht humbjen dhe mosrealizimin e objektivave të veta. Ndërsa besoj se mazhoranca ka qenë më shumë e prirur për të qetësuar këtë lloj konflikti, për të ecur në rrugën e institucioneve apo edhe të bashkëpunimit.
Përsa i takon LSI-së, unë e kuptoj gjithmonë këtë prirjen për të parë LSI-në në raport me PD-në apo me PS-në. Mendoj se të gjithë duhet të kenë parasysh se LSI sjelljen e saj e ka në raport me vendin. E ka në raport me interesat e tij, sot, në të ardhmen dhe në këtë raport i shikon edhe partnerët e mundshëm. Ndaj LSI do të jetë gjithnjë në anën e duhur do të jetë në anën e stabilitetit të vendit, të forcimit të institucioneve dhe respektimit të tyre edhe atëherë kur nuk na pëlqejnë vendimet e këtyre institucioneve dhe njëkohësisht në anën e integrimit evropian të Shqipërisë.
Që do të thotë në rast se në 2013-n, PS është me programin e duhur dhe me qëllimet e duhura, ju mund të bashkëpunoni me këtë lidership aktual?
Po më dukeni pak si ëndërrimtare dhe ju kërkoj ndjesë nëse nuk e kuptoni. Të gjithë dëshirojnë që PS-ja si një forcë e rëndësishme politike në vend të marrë përgjegjësitë e duhura sepse ka disa vite që u shmanget këtyre përgjegjësive duke e vënë veten e saj në funksion të vendit, dhe jo duke vënë interesat e vendit në funksion të lidershipit të saj. Ndërsa për çështjet e tjera mund t’ju them se ne jemi një forcë politike që u qëndrojmë marrëveshjeve në mënyrë tepër të qëndrueshme dhe natyrisht që do të vazhdojmë t’i qëndrojmë kësaj marrëveshjeje. M’u dukët pak ëndërrimtare kur folët për rol të rëndësishëm në proceset integruese të vendit, se po të kemi parasysh në rast se do të ishte votuar Gjykata Administrative do të ishte një hap shumë pozitiv për vendin, për reformat, për drejtësinë, për biznesin e sipërmarrjen e lirë në Shqipëri. Do të ishte dhënë një mesazh tepër pozitiv ndaj partnerëve tanë dhe në rast se nuk do t’i qëndrohej me kokëfortësi disa kërkesave të parealizueshme dhe jashtë institucioneve, jashtë edhe këshillave të partnerëve ndërkombëtarë, Shqipëria sot do ta kishte statusin e vendit kandidat sepse dihej që u realizua liberalizimi i vizave nga mazhoranca në kohën e premtuar edhe pse për fat të keq nuk pati as edhe një kontribut pozitiv, po flas nga 28 qershori deri ditën e vendimin për heqjen e vizave, nga ana e lidershipit të kësaj force politike. Përkundrazi, u trumbetua me të madhe se do të largoheshin nga Shqipëria mbi 800 mijë shqiptarë kur të liberalizoheshin vizat ëpr shkak të varfërisë dhe për shkak të mjerimit, dhe sot asnjë shqiptar nuk i ka shkelur e lëvizjes së lirë në zonën Shengen.
Në fakt, me këtë duhet të krenohen shqiptarë dhe jo klasa politike kam përshtypjen....
Jo ne duhet të krenohemi të gjithë, të paktën ne që kemi shprehur bindjen se shqiptarë do t’i përmbushin këto detyrime dhe krenohemi të gjithë sepse Shqipëria edhe në raport me vendet e tjera të Ballkanit Perëndimor ka qenë vendi më korrekt me Bashkimin Europian.
Ju jeni një ndër themeluesit e PS-së, keni arritur kulmin e karrierës politike, keni provokuar skizmën brenda kësaj force duke krijuar LSI-në. Kur themi provokuar skizmën e suksesshme për të pasur një forcë tjetër politike, por në 20-vjetorin e themelimit të PS-së ju nuk ishit as i ftuar. Si u ndjetë i paftuar nga njeriu të cilin ju e keni ndihmuar të ngjitet në pushtet?
Të them të drejtën nuk është se e kam përjetuar rëndë, aq më tepër që atë ditë kam qenë me fëmijët e mi dhe ka qenë një ditë e mrekullueshme, sepse ishte diel. Natyrisht, duke ndjekur mediat dhe lajmet, dakord mund ta pranojmë që Ilir Meta nuk është ftuar, edhe pse un mendoj që një forcë politike serioze i fton të gjitha forcat politike të vendit në ditëlindjen e saj. Megjithatë, mungesa e z. Nano ishte diçka pa kuptim, pasi dihet që ai ka qenë kryetari i parë i kësaj force politike dhe politikan që ka kontribuar mjaft në transformimin e kësaj force politike. Jo vetëm kaq, por që ka ftuar z. Rama direkt nga Parisi për ta bërë direkt ministër i kësaj partie. Këtë e përmenda thjesht për respekt të historisë.
Socialistët flasin mirë për njëri-tjetrin kur janë jashtë kësaj force politike më ngjan..
Jo nuk ka të bëjë me këtë. Ju më pyetët për një përvjetor dhe natyrisht unë kam ndjekur shumë aktivitete. Kam ndjekur aktivitete të SPD-së gjermane, ku Helmut Shmidi është i ftuar në çdo aktivitet. Jo vetëm kaq, por atje nuk është e lejuar të pihet duhani, ndërsa Shmidi është i vetmi që pi edhe duhan aty. Është çështje respekti për historinë, është një mesazh për të gjithë ata që kanë punuar, që e kanë themeluar, shumë prej tyre nuk janë aktivë në politikë, por këto janë momente ku ka një veneracion ndaj të gjithëve. Jo vetëm ndaj atyre që janë sot por edhe ndaj atyre që kanë qenë përpara sepse në fund të fundit prandaj mendoj që janë edhe përvjetorët.
Më bën përshtypje pse nuk ishte z. Nano, sepse ai në fund të fundit vazhdon të jetë pjesë e PS-së, ndërsa unë në fund të fundit kam krijuar nj tjetër forcë politike, kam të tjera raporte, ndaj edhe i kuptoj.
Jeni të gjithë të majtë dhe të paktën i përkisni forcave të majta, a ju shqetëson pyetja “quo vadis” e majta shqiptare?
Tani, po të kemi parasysh zhvillimet në vetë PS-në, po të kemi parasysh që ju hapët temën e 20-vjetorit, pra të mesazhit që u dha atje dhe të prezencës apo të mosprezencës së emrave të ndryshëm për shumë aspekte të tjera, mendoj se është shumë e vështirë t’i kërkosh lidershipit të PS-së më shumë përgjegjësi për të mirën e të majtës aq më tepër që edhe aleatët e tanishëm ankohen për padrejtësitë që i janë bërë nga jko forcë politike në zgjedhjet e 8 majit. po kështu fakti që edhe disa figura të njohura ngrenë shqetësimet për demokracinë e brendshme për mospërfilljen ndaj mendimit të tyre, absolutisht do të thotë që kjo është një pyetje të cilës nuk mund t’i japim ndonjë përgjigje sot, por për ne është e rëndësishme që t’i japim sa më shumë përgjigje qytetarëve shqiptarë për shqetësimet për angazhimet e tyre dhe t’i lëmë PS-së kohën e mjaftueshme për të reflektuar.
Në rast se i qëndrojmë deklaratës më të fundit të z. Rama që nëse verdikti finale nga KQZ apo Kolegji Zgjedhor nuk e shpall atë fitues, do të kalohet në një aksion politik deri në formën e revoltës popullore, është përmendur edhe fjalë humnerë nuk dihet ku shkon Shqipëria, juve ju shqetëson seriozisht një gjë e tillë dhe e besoni se mund të ndodhë kështu?
Nuk mund të them se gëzohem kur dëgjoj deklarata të tilla, sepse t’u bësh njerëzve shantazhe të tilla përditë nëpër ekrane nëpër takime e konferenca shtypi mendoj se është një mungesë ë plotë respekti për qytetarët këtij vendit përveçse institucioneve dhe elementi tjetër është që unë nuk pre të ndodhi ndonjë hata më e madhe se sa ka ndodhur, por natyrisht që zgjedhjet e 8 majit dhanë një mesazh të qartë që fryma e konfliktit nuk vlerësohet nga qytetarët shqiptarë, është e papranueshme dhe kush nxit këtë frymë do të vazhdojë të mbetet në pakicë.
Mesazhi më i fundit nga Brukseli ishte i qartë për klasën politike: nëse nuk gjeni zgjidhje për situatën politike dera është e mbyllur. Nga e shihni mundësinë e zgjidhjes?
Situata është tërësisht e zgjidhshme. Është respektimi i institucioneve nga të gjithë. Respektimi i institucioneve nga mazhoranca, respektimi i institucioneve nga opozita, nga të gjithë aktorët, është një gjuhë tjetër nga ajo që përmendet ju që po nuk u shpalla unë fitues do të bëhet hataja, do të bëhet qameti, do të digjet Shqipëria. Këto janë sjellje tërësisht të papërgjegjshme. Shqipëria ka ekzistuar para se të lindnim ne, do të ekzistojë edhe kur ne të mos jemi më në politikë, madje edhe kur ne të mos jemi më në këtë botë dhe do të ecë përpara për fatin e saj të mirë.
A mos po e sakrifikojmë Evropën për interesat e pushtetit z. Meta?
Absolutisht që ajo është sakrifikuar deri tani. E thashë që nëse do të ishte votuar Gjykata Administrative, që nuk është një favor për qeverinë, përkundrazi në qoftë se do të ishin bërë edhe disa ligje të tjera që nuk janë vetëm në interesin e qeverisë, por janë në interes të forcimit të institucioneve, të pavarësisë së tyre, ligje të bëra me ekspertizën e Europës dhe kështu me radhë, absolutisht që vendi do të ecte në rrugë normale. Natyrisht që një vend që ka një opozitë më vjen keq ta them, kaq destruktive sepse ju vetë thatë se çfarë do të bëjë opozita nëse nuk merr rezultatin që dëshiron, do ketë humnera, gremina, etj., natyrisht që nuk e plotëson një standard për të qenë në Europë. Në këtë drejtim ne duhet të tregohemi të duruar dhe t’i japim dhe opozitës kohën e duhur për të qenë edhe ajo e standardeve evropiane në sjelljet e saj.
