E enjte, 23 qershor 2011, NOA- Eurokomisioneri për zgjerim Stefan Fyle sot në Bruksel ka pritur kryeministrin e Maqedonisë Nikolla Gruevski me të cilin kanë biseduar lidhur procesin e integrimit të vendit si dhe prioritetet e Qeverisë së re. Por, nga ana tjetër, eurokomisioneri Fyle ka porositur që qeveria e re të bëjë hapat e mëtejshëm për reforma.
Pas takimit në Bruksel, komisioneri Fyle lëshoi një kumtesë ku përshëndeti dialogun konstruktiv, siç e quajti ai, me Nikolla Gruevskin. Pasi lavdëroi zgjedhjet, Fyle bëri thirrje për formim të shpejtë të qeverisë, në mënyrë që ti kthehen punës për reformat.
“Ramë dakord për hapat e mëtejmë në reformat europiane: zbatim të vërtetë të reformës në administratën publike dhe në gjyqësor, në luftën kundër korrupsionit dhe në garantimin e lirisë së mediave. Theksova gjithashtu se puna për Marrëveshjen e Ohrit dhe për romët duhet të ecë përpara”, deklaroi Fyle, duke ofruar përkrahje në këtë çështje dhe duke përkujtuar që do të marrë pjesë në shtator, në festimet e 10 vjetorit të MO-së.
Eurokomisioneri Fyle ka përshëndetur zgjedhjet transparente dhe demokratike, sidomos ditën e mbajtjes së tyre dhe se ata presin tanimë formimin e shpejt të koalicionit qeveritar.
Por, mediat proqeveritare kanë raportuar vetëm për procesin e reformave në fushën e gjyqësorit, administratës publike, luftën kundër korrupsionit, lirinë e shprehjes së mediave dhe nuk kanë përmendur Marrëveshjen e Ohrit.
Edhe çështja e emrit ka qenë temë e bisedës mes Fyle dhe delegacionit të Qeverisë, ku sipas ministrit të jashtëm Antonio Milloshoski i pranishëm në takim, Fyle ka mbështetur vullnetin dhe përkushtimin e dyja palëve për gjetjen e një zgjidhje për kontestin e emrit. (INA)/NOA
