Bruksel, 25 qershor 2011, NOA - Presidenti i Komisionit Europian, Jose Manuel Barroso tha se Maqedonia mund të humbë rekomandimin për fillimin e negociatave për anëtarësimin në BE, nëse nuk përmbush reformat e parashikuara, të domosdoshme për anëtarësimin.
“Unë isha kohë më parë në vendin tuaj, dhe ua bëra të qartë autoriteteve se ata duhet të bëjnë disa reforma. Është e qartë se pa vazhdimin dhe pa përforcimin e atyre reformave ne nuk mund të japim shpresa për anëtarësim. Është shumë e rëndësishme që të ruhen përpjekjet dhe shpresoj që këtë ta kenë kuptuar mirë autoritetet e vendit tuaj”, deklaroi të premten presidenti i KE-së, Barroso.
Ndërsa, Kryeministri i Hungarisë, Viktor Orban, i pyetur pse Maqedonia nuk përmendet në konkluzionet, u përgjigj se “Vendi juaj u përmend së bashku me vendet tjera të Ballkanit Perëndimor. Nëse i lexoni konkluzionet përfundimtare, kjo është e qartë. Nuk është përmendur thjesht vetëm Kroacia, por edhe pasojat e këtij vendimi për anëtarësimin e Kroacisë, të cilat janë mesazh i mirë dhe inkurajues për Ballkanin Perëndimor”, deklaroi Orban.
Liderët europianë dje i çelën dritën jeshile Kroacisë për rrugën drejt BE-së, duke miratuar përfundimin e negociatave për anëtarësimin, të udhëhequra bashkë me Zagrebin që nga viti 2005.
Në takimin e kreut të BE-së në Bruksel liderët evropianë deklaruan se kërkohet të ndërmerren të gjitha zgjidhjet e nevojshme për përfundimin e negociatave për inkuadrimin e Kroacisë në BE deri në fund të këtij muaji.
Në praktikë kjo është e barabartë me dhënien e lejes për hyrjen e një vendi kandidat në BE.
INA/NOA
