Athinë, 26 qershor 2011, NOA - Pas votëbesimit një javë më parë, qeveria e riformatuar e kryeministrit grek Jorgo Papandreu do të çojë nesër në parlament programin afatmesëm të daljes nga kriza, i cili duhet të marrë miratimin e shumicës së deputetëve për t’i lejuar kështu Greqisë lëvrimin e këstit të 5-të të kredisë nga vendet e eurozonës.
Megjithë numrat në favor të tij, kryeministri grek i druhet një çarjeje në grupin parlamentar, nga i cili kanë deklaruar qëndrimin kundër 3 deputetë.
Në një përpjekje për t’i bindur, ministri i sapozgjedhur i Ekonomisë, Evangelos Venizelos u është drejtuar duke u thënë se “nëse votojnë kundër Greqia rrezikon të humbasë kredinë disa miliardë euro”.
Votimi në parlament i programit afatmesëm pritet të shoqërohet me protesta në sheshin para godinës së parlamentit.
Dhjetra shoqata dhe grupe sindikalistësh kanë paralajmëruar një tubim që do të kundërshtojë programin e daljes nga kriza.
Po ashtu është lajmëruar edhe një grevë 48 orëshe në disa sektorë publikë dhe privatë. Programi i ri afatmesëm i shpëtimit të Greqisë parashikon masa të ashpra shtrënguese në paga dhe pensione si dhe shkurtime drastike në shpenzimet publike.
mit/NOA
