Tiranë, 28 qershor 2011, NOA- (Update) Komisioni Qendror i Zgjedhjeve ashtu sikurse u lajmërua që në fillim nga relatori i çështjes Arben Ristani ka rrëzuar me 4 vota pro, kërkesën e partisë socialiste për pavlefshmërinë e zgjedhjeve në kryeqytet.
Pas dëgjimit të palëve kreu i këtij komisioni, hodhi në votim kërkesën e socialistëve, por pretendimet e socialistëve u rrëzuan për dy arsye, për mungesë kompetence nga ana e KQZ për shqyrtimin e çështjes dhe ezaurimin e afatit ligjor të ankimimit.
Pas kësaj përfaqësuesi ligjor i socialistëve Genci Gjonçaj kërkoi nga anëtarët e KQZ dhe nga kryetari i tij që të zbardhin sa më shpejt këtë vendim, në mënyrë që të ankimohet.
Sipas ankimimit të socialistëve të bërë ditën e djeshme krahas mosnjohjes dhe kundërshtimit të Lulzim Bashës si kryebashkiak, u kërkua edhe kundërshtia tjetër për pavlefshmëri të zgjedhjeve në 284 qendrat e votimit në Tiranë, gjë që duket se do të përballet me një tjetër ankimim.
a.y/NOA
