Tiranë, 30 qershor 2011, NOA – Administrata publike dhe gjykatat mbeten pikat e dobëta të integritetit ndaj korrupsionit në Shqipëri.
Transparency International Albania publikoi sot raportin më të fundit me vlerësimet mbi progresin në luftën kundër korrupsionit në tre pushtete; gjyqësor, ekzekutiv dhe legjislativ.
Përfaqësuesja e TIA-s deklaroi se pas analizimit të 159 indikatorëve duke përdorur standardet e Bashkimit Europian në matjen e korrupsionit, rezulton se hetimi i korrupsionit në vend është shpeshherë i pamundur.
Këtu TIA foli për administratën publike, duke e cilësuar atë si pikë të dobët të integritetit dhe besueshmërisë.
“Konkurset në administratë shpesh herë janë fiktive”, bën me dije raporti i TIA-s.
TIA apeloi që të bëhen ndryshime në statusin për nëpunësin civil.
Më tej TIA theksoi se edhe gjykatat mbeten pikë e dobët sa i përket korrupsionit.
TIA deklaroi se është i domosdoshëm miratimi i ligjit që do t’i hapë rrugë ngritjes së Gjykatës administrative në vend, shtatë syresh në mbarë vendin.
Përfaqësuesja e TIA-s tha se për raportin mbi progresin në luftën kundër korrupsionit janë analizuar një sërë dokumentesh të BE-së, janë realizuar intervista ekspertë.
mit/NOA
