Tiranë, 30 qershor 2011 NOA- Ministri i Financave Ridvan Bode priti sot një delegacion të Bankës Botërore të kryesuar nga Drejtori i ri që përfaqëson interesat e vendeve të rajonit në BB, Piero Cipollone dhe Drejtoresha për Rajonin Jane Armitage.
Siç njofton zëdhënsja,ministri Bode theksoi se Shqipëria ka një marrëdhënie shumë të mirë e një bashkëpunim të ngushtë me stafin e Bankës.
Qeveria shqiptare ka një bashkëpunim të suksesshëm me bankën Botërore. Pas përfundimit me sukses të programit DPL (Kredi për Mbështetjen e Politikave të Zhvillimit) me një portofol prej rreth 20 milionë USD, tashmë është nënshkruar marrëveshja e DPL 2, e cila ka një portofol prej rreth 25 miliona USD dhe që do të fokusohet në realizimin e reformave në sistemin e kujdesit shëndetësor; edukimin; dhe kujdesin social.
Z. Piero Cipollone, ka zëvendësuar në këtë detyrë z. Giovanni Magnoni dhe zgjodhi të parën Shqipërinë për vizitën e prezantimit të tij, pas marrjes së detyrës, përfundon njoftimi për shtyp i ministrisë së financave.
a.q/NOA
