Athinë, 2 korrik 2011, NOA, Update – Këshilli i Internacionales Socialiste i mbledhur në kryeqytetin grek, Athinë, në datat 1-2 korrik deklaroi se rezultatet në zgjedhjet lokale të 8 majit treguan një sukses të madh për “Aleancën për të Ardhmen”, e udhëhequr nga Partia Socialiste, e cila fitoi në zonat më të mëdha urbane të vendit.
“IS ka ndjekur me shumë kujdes situatën e krijuar në kryeqytetin e Shqipërisë, Tiranë, ku procesi i numërimit të votave u përmbyll me fitoren e kryetarit të bashkisë Edi Rama (PS), ndaj kandidatit të Partisë Demokratike Lulzim Basha, me një diferencë prej dhjetë votash nga 250.623 vota”, deklarohet në rezolutën e miratuar nga Këshilli i Internacionales Socialiste.
Internacionalja raporton se “Vendimi i maxhorancës së Komisionit Qendror të Zgjedhjeve për të numëruar votat e hedhura gabimisht nuk u bazua në asnjë dispozitë të Kodit Zgjedhor të Republikës së Shqipërisë”.
“Përmbysja e rezultatit fillestar është shumë shqetësuese, duke rrezikuar edhe njëherë ligjshmërinë e votës në Shqipëri dhe duke zgjatur tensionin politik ekzistues dhe mungesën e stabilitetit në vend”, thuhet në rezolutën e Internacionales Socialiste.
IS i referohet vendimit të Kolegjit Zgjedhor pas ankimimit të PS-së duke nënvizuar se “deri tani Kolegji Zgjedhor ka treguar pavendosmëri për të bërë drejtësi”.
Në rezolutën e miratuar për krizën e tejzgjatur politike në Shqipëri, që zu fill plot dy vjet më parë, pas zgjedhjeve të përgjithshme parlamentare të 28 qershorit 2009 e vështirësuar edhe më tej pas atyre lokale të 8 majit, Këshilli i Internacionales Socialiste me president kryeministrin grek Jorgos Papandreu, shpreh shqetësimin e thellë për krizën e zgjatur politike në Shqipëri.
Internacionalja Socialiste i bën thirrje autoriteteve shqiptare se parakusht për zhvillimin e mëtejshëm dhe integrimin europian të Shqipërisë është funksionimi i demokracisë përmes mbajtjes së zgjedhjeve të lira dhe të ndershme.
mit/NOA
