E diel, 3 korrik 2011, NOA- Hillari Klinton, Sekretarja Amerikane e Shtetit deklaroi se lideri libian Muamar Geddaf duhet të tërhiqet.
Një një konferencë për mediat Klinton iu përgjigj kërcënimeve të Geddafit ndaj Europës duke thënë: “Në vend që të bëjë kërcënime, Geddafi duhet të verë mirëqenien dhe interesat e popullit të tij para të vetave dhe të largohet nga pushteti që të mundësojë një tranzicion demokratik që përmbush aspiratat e popullit libian”.
Siç raporton Zëri i Amerikës, Sekretarja Amerikane e Shtetit Hillari Klinton iu përgjigj Geddafit në një konferencë shtypi në Spanjë, ku ndodhej në kuadër të turneut të fundit evropian.
Më tej ajo shtoi se, misioni i udhëhequr nga NATO po ecën si duhet, presioni mbi Geddafin po shtohet dhe kryengritësit po marrin fuqi, duke shprehur bindjen se duhet çuar deri në fund misioni i nisur dhe se të gjithë janë në një mendje për këtë.
Në një reagim të dy ditëve më parë udhëheqësi libian Muamar Geddafi u tha përkrahësve të tij në një tubim në Tripoli se shtëpitë, zyrat dhe familjet në Evropë do të bëhen objektiva të përligjshme për ushtrinë e tij, nëse sulmet e NATO-s vazhdojnë.
a.y/NOA
