Tiranë, 6 korrik 2011, NOA – Kolegji Zgjedhor do të shqyrtojë sot padinë e Partisë Socialiste të datës 2 korrik. Në këtë kërkesë-padi, PS i kërkon trupit gjykues të urdhërojë Komisionin Qendror të Zgjedhjeve të shqyrtojë kërkesën e PS-së për shpalljen të pavlefshëm të vendimit ku kandidati demokrat Lulzim Basha u shpall fitues i garës në Tiranë, me 92 vota më shumë se kandidati socialist Edi Rama, si edhe shpalljen të pavlefshëm të rezultatit për Tiranën i publikuar në tabelën përmbledhëse.
Kjo kërkesë nuk u mor në shqyrtim nga KQZ pas përfundimit të hapjes së 1793 kutive dhe leximit të votave të hedhura gabim si edhe kqyrjes së fletëve të votimit të pavlefshme, numërim i urdhëruar nga Kolegji Zgjedhor në vendimin e 13 qershorit. Relatore e çështjes do të jetë gjyqtarja Sashenka Jonuzi, ndërsa anëtarë të trupit gjykues do të jenë Dhurata Haveri, Astrit Kalaja, Meriban Mullaj.
Kolegji Zgjedhor vendosi të shqyrtojë padinë e 2 korrikut, pas tërheqjes së Partisë Socialiste të mërkurën, nga njëra prej kërkesave të padisë së 30 qershorit, ku opozita kërkonte pavlefshmëri të zgjedhjeve në 284 qendra votimi në Tiranë dhe ripërsëritjen e tyre.
Kolegji Zgjedhor e pranoi tërheqjen duke vendosur për të enjten shqyrtimin e ankimimit mbi vendimin e KQZ-së.
Opozita garantoi dje se pas marrjes në shqyrtim të ankesës së PS-së e pashqyrtuar nga KQZ, kërkesa për pavlefshmëri të zgjedhjeve në Tiranë do të vazhdojë të jetë në thelb të padisë së socialistëve.
Sipas përfaqësuesit ligjor të PS-së Damian Gjiknuri, PS ka edhe një padi tjetër për të bërë, duke siguruar se çështja e zgjedhjeve në Tiranë nuk ka përfunduar.
Pas dëgjimit të pretendimeve të palëve, trupi gjykues pritet të japë vendimin, nëse do ta rikthejë kërkesën e PS-së në KQZ për t’u shqyrtuar, apo do ta mbyllë çështjen pikërisht brenda dyerve të Kolegjit, duke lënë në fuqi vendimin e KQZ-së.
Verdikti pritet sot në një seancë maratonë në Kolegjin Zgjedhor, që do të nisë në orën 10.00.
mit/NOA
