Tiranë, 9 korrik NOA – Kapet njëri prej 4 pengmarrësve të ditës së djeshme në Tiranë. Burimet policore konfirmuan për agjencinë NOA se është arrestuar 31 vjeçari Esat Luga, i cili u përfshi të premten në pengmarrjen disa orëshe të Sajmir Shenjatarit. Luga u ndalua e më pas arrestua pranë zonës “Don Bosko”, ndërkohë që janë shpallur në kërkim edhe 3 pengmarrësit e tjerë.
Në orën 19 të ditës së djeshme, pronari i një pike bastesh sportive dhe një furre buke u mor peng pranë “Profarmës”.
Kanë qenë katër persona të pamaskuar, të cilët e kanë marrë me forcë 30-vjeçarin, Sajmir Shenjatari dhe e kanë futur në një makinë, duke shkuar në drejtim të komunës Dajt. Burime policore i thanë agjencisë NOA se një telefonatë është bërë te familja e Saimirit, duke i thënë se ai është rrëmbyer dhe mbahet peng prej tyre.Policia tha se po heton pistën e pengmarrjes sikurse ka denoncuar familja por nuk përjashton dhe pista të tjera ku përfshihet ndonjë borxh i mundshëm i pashlyer dhe vetëgjyqësia.
a.q/NOA
