Tiranë, 9 korrik 2011 NOA - Procesi i demontimit të municioneve të tepërta në Ministrinë e Mbrojtjes, ka hyrë tashmë në një rrugë të mbarë e cila sipas parashikimeve do të mbarojë brenda vitit 2013. Ky fakt është konfirmuar edhe një herë nga zv/ministri i Mbrojtjes, Ekrem Spahia.
Sipas zv/ ministrit Spahia, vetëm gjatë muajit qershor janë demilitarizuar 2 444 ton municione, ndërsa për 6 mujorin e parë të këtij viti, janë demiltarizuar 10,394 ton municione të llojeve dhe kalibrave të ndryshëm. Kjo tregon edhe një herë rëndësinë që ka ky proces për Ministrinë e Mbrojtjes, si dhe rikonfirmon edhe një herë vëmendjen që ajo i kushton pastrimit të territorit të Republikës së Shqipërisë, nga municionet dhe mbeturinat e së kaluarës.
“Në zbatim të Planit të Veprimit të Ministrisë së Mbrojtjes për Asgjësimin e Municioneve të Tepërta në Forcat e Armatosura, ecuria e procesit të asgjësimit të municioneve në muajin qershor dhe 6-mujorin e I-rë të vitit 2011, ka ecur me ritme mjaft të mira. Gjatë muajit Qershor 2011, janë demilitarizuar 2,444 ton municione, që është sasia më e madhe e arritur ndonjëherë brenda një muaji. Ndërsa për 6 mujorin e parë 2011 janë demiltarizuar 10,394 ton municione të llojeve dhe kalibrave të ndryshëm. Krahasuar me 6 mujorin e parë të vitit 2010, kur kishim arritur në 8.160 ton municione të demilitarizuara, në 6 mujorin e parë të vitit 2011 kemi demilitarizuar 2.234 ton më shumë”, u shpreh ndër të tjera zv/ministri Spahia.
a.q/NOA
