Tiranë, 12 korrik 2011, NOA – Ashtu siç edhe pritej edhe konstitutimi i Këshillit bashkiak të Tiranës do të kalojë nga Kolegji Zgjedhor. Komisioni Qendror i Zgjedhjeve nuk mundi të arrijë kuorumin e cilësuar të votave, 5 me 2, për të konstituuar Këshillin e ri bashkiak të Tiranës dhe miratuar emrat e 55 mandateve të reja.
Gjatë mbledhjes së djeshme, e cila u zhvillua me debate mes kryetarit të KQZ-së Arben Ristani dhe përfaqësuesve të opozitës në KQZ, me 4 vota pro dhe 2 kundër u rrëzua në parim tabela përmbledhëse për shpërndarjen e mandateve në Këshillin Bashkiak të Tiranës.
Përfaqësuesit e opozitës në KQZ deklaruan se janë kundër aktit, duke theksuar se në tabelën e paraqitur nuk ka vullnet zgjedhësish.
Edhe nënkryetarja e KQZ-së Dëshira Subashi u shpreh kundër këtij akti.
Për miratimin e mandateve të këshilltarëve të rinj të bashkisë së Tiranës që dolën nga zgjedhjet administrative të 8 majit kërkohet votim i cilësuar, pra 5 me 2.
Sipas Kodit Zgjedhor instanca e vetme që i jep zgjidhje problemit është Kolegji Zgjedhor.
Tashmë pritet që Komisioni Qendror i Zgjedhjeve brenda afateve ligjore t’i drejtojë një kërkesë Kolegjit Zgjedhor, që ky i fundit ta urdhërojë KQZ-në të miratojë mandatet e Këshillit Bashkiak me shumicë të thjeshtë, pra vetëm me katër votat e anëtarëve të mazhorancës në KQZ, nga shtatë anëtarët që ka institucioni zgjedhor.
KQZ lajmëroi mbledhjen e radhës për paraditen e të martës, në orën 11.00.
Në zgjedhjet administrative të 8 majit, koalicioni qeveritar “Aleanca për Qytetarin” siguroi mazhorancën e vendeve në Këshillin Bashkiak të Tiranës kundrejt koalicionit opozitar “Aleanca për të Ardhmen”.
“Aleanca për Qytetarin” fitoi 28 këshilltarë, ndërkohë që “Aleanca për të Ardhmen” 27 këshilltarë.
mit/NOA
