Tiranë, 12 korrik 2011 NOA - Kryetarja e Kuvendit, Jozefina Topalli ka deklaruar se opozita është e mirëpritur të japë kontributin e saj për reformën zgjedhore. Topalli priti sot në takim Kreun e prezencës së OSBE-së në Tiranë, ambasadorin Eugen Wollfarth.
Sipas njoftimit të zyrës së shtypit të Kuvendit, kryetarja Topalli e informoi kreun e prezencës së OSBE-së, për ofertën e bërë nga mazhoranca për sa i përket ndërmarrjes së nismave për reformën e ardhshme zgjedhore, bazuar në rekomandimet e OSBE-së, ashtu sikundër për sa i përket bashkëpunimit mazhorancë-opozitë për të votuar në Kuvend ligjet që kanë shumicë të cilësuar.
Kryetarja e Kuvendit theksoi se opozita është e mirëpritur të japë kontributin e saj në këtë proces, se ky nuk është një kontribut vetëm për parlamentin dhe parlamentarizmin, por është një kontribut për shqiptarët dhe Shqipërinë në objektivin e madh të tyre në rrugën e zhvillimit dhe integrimit në Europë.
a.q/NOA
