Shkup, 12 korrik 2011, NOA - Data e 17 korrikut është afati përfundimtar për formimin dhe shpalljen e koalicionit të ri qeveritar të Maqedonisë nga kryeministri Nikolla Gruevski. Deri në fund të javës pritet të shpallet marrëveshja e koalicionit.
Negociatat për Qeverinë e re të nisura nga VMRO-DPMNE dhe BDI që prej 28 qershorit nuk janë finalizuar ende, ndërsa vijimi i tyre dhe nënshkrimi i ndonjë marrëveshjeje paraprake nuk është bërë publik për mediat dhe opinionin.
Ndarja e disa drejtorive dhe synimi i partisë shqiptare për të drejtuar dy drejtori nga ato më të rëndësishmet siç janë: Drejtoria e Sigurimit Publik dhe Drejtoria e Sigurimit dhe Kundërzbulimit të MPB-së si dhe Drejtoria e të Ardhurave Publike (DAP) dhe Drejtoria e Doganave; ka bërë që të ketë ngecje dhe mosmarrëveshje për të finalizuar procesin e shpalljes së Qeverisë.
Deri në fund të javës pritet të shpallet marrëveshja e koalicionit, ku BDI kërkon gjithashtu afate rreth përmbushjes së detyrimeve të saj, që janë ligji për gjuhën shqipe, statusi i UÇK-së, zhbllokimi i proceseve eurointegruese me zgjidhjen e emrit si dhe çështje tjera.
Por, nga ana tjetër, jozyrtarisht, VMRO-DPMNE parimisht është pajtuar për të përmbushur disa nga detyrimet, mirëpo pa afate të kushtëzuara dhe pa nënshkruar ndonjë marrëveshje liderësh midis Nikolla Gruevskit dhe Ali Ahmetit.
Deri tani partitë e koalicionit kanë përfunduar me ndarjen e posteve ministrore dhe posteve tjera, ku BDI do të udhëheqë me dy zëvendëskryeministra në Qeveri (zëvendëskryeministri për Marrëveshjen e Ohrit dhe ai për Eurointegrime) si dhe pesë ministri: Mbrojtje, Drejtësi, Ekonomi, Pushteti Lokal, Ambienti Jetësor,etj.
Dy partitë nuk kanë zyrtarizuar ende asnjë kandidaturë për udhëheqjen e posteve ministrore, ndërsa tërë procesi i negociatave ka kaluar në heshtje dhe larg vëmendjes së opinionit publik.
INA/NOA
