E hënë, 18 korrik 2011, NOA – Presidenti i Shteteve të Bashkuara të Amerikës Barack Obama falenderoi kryeministrin Sali Berisha për mesazhin që ky i fundit i dërgoi shefit të Shtëpisë së Bardhë në kremtimin e 235-vjetorit të Pavarësisë së SHBA-ve, që kujtohet çdo 4 korrik.
Zyra e shtypit e qeverisë bën me dije përmes një njoftimi se kryeministri Berisha mori një mesazh falenderimi nga Presidenti i SHBA-ve, Barack Obama, ku Presidenti amerikan i shpreh mirënjohjen për mesazhin e dërguar për festën e Pavarësisë.
Në mesazhin e tij, Presidenti amerikan shkruan se në Ditën e Pavarësisë, amerikanët festojnë dhe kujtojnë idealet e demokracisë dhe lirisë, mbi të cilat u themeluan SHBA-të.
Sipas Obamës këto ideale mbeten në syrin e të gjitha sfidave botërore me të cilat përballen sot Shtetet e Bashkuara të Amerikës.
Më tej lexoni mesazhin e plotë të Presidentit Obama drejtuar kryeministrit Berisha.
“I dashur zoti Kryeministër,
Dëshiroj t’ju falënderoj për mesazhin e urimit në përvjetorin e 235- të të Pavarësisë së Shteteve të Bashkuara.
Në Ditën e Pavarësisë, amerikanët festojnë dhe kujtojnë idealet e demokracisë dhe lirisë, mbi të cilat u themelua vendi ynë. Këto ideale mbeten po aq aktuale edhe në këtë moment që ne përballemi me sfidat e sotme botërore. Shpresa ime është që të mirat e lirisë dhe paqes t’i gëzojnë një ditë të gjithë popujt e botës.
Sinqerisht,
Barack Obama.”
mit/NOA
