Tiranë, 18 korrik 2011 NOA – U nis sot drejt Afganistanit kontigjenti i 3-të i paqeruajtësve, të përbërë nga “Herat 9” dhe “Eagle 3”, prej 222 trupa, efektivë këto të Forcës Tokësore. Ceremonia e përcjelljes së tyre u zhvillua në mjediset e Batalionit Komando në Zall Herr, ku të pranishëm, me këtë rast, ishin Shefi i Shtabit të Përgjithshëm të Forcave të Armatosura Gjeneral Major Maksim Malaj, Komandanti i Forcës Tokësore Gjeneral Brigade Viktor Berda, zv/ministri i Mbrojtjes z. Ekrem Spahia, atashe ushtarakë Amerikanë dhe Italianë të akredituar në Tiranë. Shefi i Shtabit të Përgjithshëm Gjeneral Major Maksim Malaj tha se Afganistani është misioni më i rëndësishëm në historinë mbi 60-vjeccare të Aleancës dhe për këtë arsye, përfundimi me sukses i tij përbën një detyrim të madh për të gjithë ne.
Në fund të ceremonisë, duke ju uruar rrugë të mbarë dhe suksese në misionin e tyre fisnik, Gjeneral Major Maksim Malaj bëri dhe dorëzimin e Flamurit Kombëtar, komandantit të këtij misioni të kontigjentit “Eagle 3”, nëkolonel Egland Dautaj.
a.q/NOA
