Tiranë, 20 korrik 2011, NOA Update – Një zjarr i madh është përhapur pak momente më parë në mjediset e një fabrike plastmasi që ndodhet në zonën e ish-kombinatit Poligrafik në Tiranë.
Dëshmitarë nga vendngjarja thonë se flakët e zjarrit janë përhapur me shpejtësi në të tërë ndërtesën njëkatëshe ku ishte ngritur fabrika duke u përhapur edhe në zonën përreth.
Makinat zjarrfikëse ndodhen në këto momente në vendngjarje dhe po punojnë intensivisht për shuarjen e flakëve.
Janë disa makina të zjarrfikëseve që po tentojnë të vënë nën kontroll vatrën e madhe të zjarrit pa mundur ende ta shuajnë atë, ndërkohë që priten përforcime edhe nga zjarrfikëset e Durrësit.
Policia në vendngjarje ka nisur evakuimin e banorëve.
Sipas të dhënave në momentin kur ka rënë zjarri ka patur punëtorë në fabrikën e plastmasit, dhe dy prej tyre kanë pësuar djegie të rënda dhe janë dërguar me shpejtësi në spitalin “Nënë Tereza”.
Sipas policisë shkak i zjarrit mund të jetë shpërthimi i një kablli të tensionit të lartë të energjisë. Vijon...
mit/NOA
