Tiranë, 30 korrik 2011, NOA – Në vigjilje të muajit të madhënueshëm të Ramazanit, që nis të hënën në 1 Gusht, Kryetari i Komunitetit Musliman Haxhi Selim Muça i uroi besimtarët muslimanë shqiptarë anekënd vendit dhe jashtë tij për një agjërim të begatë.
Haxhi Selim Muça uroi që muaji i Shenjtë i Ramazanit, që i paraprin festës së Bajramit të Madh t’i bekojë të gjitha familjet me lumturi, paqe dhe dashuri kudo në botë.
Ai i bëri thirrje besimtarëve muslimanë që të përfitojnë sa më shumë nga muaji i madhënueshëm i Ramazanit, i bekuar nga Perëndia.
Kryetari i Komunitetit Musliman theksoi se muaji i Ramazanit është muaji i bereqetit, begatisë dhe pajtimit.
Besimtarët muslimanë nga 1 gushti përgjatë 30 ditëve të tij, do të agjërojnë sipas të gjitha rregullave që parashikohen për agjërimin në Islam në librin e shenjtë të Kur’anit.
Muaji i madhërueshëm i Ramazanit shënon një nga pikat kyçe të besimit dhe devotshmërisë së besimtarëve muslimanë ndaj Allahut, andaj edhe në fund të tij të gjithë agjëruesit e devotshëm, besimtarët myslimanë aktivë dhe joaktivë bekohen me festën e begatisë dhe mëshirës së Allahut, Bajramin.
Nisur nga fakti se ai do të shënohet pikërisht në muajin e nxehtë të Gushtit kjo e bën edhe më të vështirë agjërimin e besimtarëve, por edhe më të begatë mirësinë që ata fitojnë nga besimi dhe përkushtimi njerëzor ndaj Zotit dhe njerëzve.
mit/NOA
