Dhërmi, 31 gusht 2011, NOA/Irma Toptani – Ditët e nxehta të gushtit e kanë rikthyer kryeministrin Berisha si çdo verë në brigjet e bukura të rivierës shqiptare, dhe pikërisht në plazhin më të afërt të saj, atë të Dhërmiut.
Kryeministri është tejet i vendosur për t’i kaluar pushimet e verës në parajsën joniane, andaj ai edhe këtë vit ka preferuar plazhin e Dhërmiut, për të kaluar disa ditë pushimi me familjen, nipërit dhe mbesat, me të cilët kryeministri është tejet i lidhur siç është çdo gjysh.
Por, pushimet e të parit të qeverisë në plazhin e Dhërmiut nuk kanë lënë pas edhe këtë vit, një nga argëtimet më të preferuara të tij, pasionin e kryeministrit për garat e notit.
Për 66-vjeçarin Berisha garat e notit duan të thonë më shumë se një rekord.
Ashtu si edhe vitin e shkuar shefi i qeverisë ka zhvilluar garën e tij tradicionale me veten, gjatë të cilës theu rekordin e tij të një viti më parë.
Këtë të shtunë ai notoi plot 132 minuta kundrejt 127 minutave të vitit të shkuar, pra pesë minuta më shumë.
Burime nga stafi i kryeministrit thanë se gara nisi në orën 11.00 dhe u mbyll pas 132 minutash, pra në orën 13.12 minuta.
Vëzhguesit e garës bënë me dije se ajo zgjati më shumë se 132 minuta, por vetë kryeministri preferon të deklarojë si kohë noti 132 minutëshin, duke e lënë pjesën tjetër për vitin e ardhshëm.
Kryeministri Berisha nuk mundi dot ta fshehë as këtë vit pasionin e tij dhe rekordin e thyer, pasi mediat në kërkim të lajmeve e kishin zbuluar të vërtetën e garës së sotme.
Zoti Berisha i ka kthyer pushimet në Dhërmi në një rit të përvitshëm gjatë stinës së verës. Kjo preferencë e tij për të zgjedhur brigjet shqiptare shkon krahas deklaratave të kryeministrit për zhvillimin e turizmit në Shqipëri, ndërsa mbetet pa fijen e dyshimit ndër të paktët politikanë shqiptarë që përzgjedh si destinacion potencial për pushimet e verës, rivierën shqiptare.
mit/NOA
