Uashington, 31 korrik 2011, NOA - Republikanët dhe demokratët duket se janë shumë afër arritjes së një marrëveshjeje për ngritjen e kufirit të borxhit të Shteteve të Bashkuara.
Burime mediatike i referohen zërave nga të dyja kampet, të cilat duket të kenë rënë dakord për një plan që parashikon edhe shkurtimin e shpenzimeve qeveritare.
Megjithatë Shtëpia e Bardhë i ka përgënjeshtruar këto zëra, ndonëse kanë mbetur vetëm dy ditë kohë për të arritur një marrëveshje.
Shpresat për arritjen e një marrëveshjeje janë shtuar pas deklaratave të kreut të republikanëve në senat, Mitch McConnell, i cili tha se është gati për të paraqitur para deputetëve të partisë së tij planin e borxhit, duke u shprehur i bindur se ai do të marrë mbështetjen e shumicës.
Pyetjes nëse do të ketë një marrëveshje me demokratët ai iu përgjigj se “po”, duke shpjeguar se bëhet fjalë për një paketë prej disa trilionë dollarësh, e cila parashikon rritje të taksave.
Megjithatë Shtëpia e Bardhë shprehet e rezervuar lidhur me zërat për arritjen e një marëveshjeje.
Ndonëse negociatat vijojnë senati amerikan hodhi poshtë planin e demokratëve për ngritjen e kufirit të borxhit.
Orët e fundit priten të jenë dramatike për të dyja palët, të cilat duhet të arrijnë medoemos një marrëveshje për të shmangur një krizë të mundshme të Shteteve të Bashkuara në kryerjen e pagesave.
mit/NOA
