Shkodër, 1 gusht 2011, NOA - Kryetarja e Kuvendit, Jozefina Topalli mori pjesë sot në aktivitetin “Përkujtimi i Mjedës” në Kukël të Shkodrës, një veprimtari e organizuar në homazh të personalitetit të shquar të letrave shqipe, poetit, prozatorit, gjuhëtarit, muzikologut, historianit, arkitektit dhe pionierit të arsimit shqiptar, Ndre Mjeda.
Aktiviteti “Përkujtimi i Mjedës”, u organizua nga Qendra e Studimeve Albanologjike dhe Fondacioni “Ndre Mjeda”, në mbështetje edhe të Arqipeshkvisë Shkodër, për të nderuar në 74-vjetorin e vdekjes së tij.
Zonja Jozefina Topalli vizitoi ambientet ku jetoi e shërbeu Dom Ndre Mjeda, ekspozitën me fotografi dhe vepra të Mjedës si dhe panairin e mbajtur me këtë rast me produkte karakteristike të zonës.
Kryetarja e Kuvendit vlerësoi këtë iniciativë të mrekullueshme dhe të merituar, që sipas saj i fton të gjithë në një moment reflektimi, meditimi, kujtese në nderim dhe respekt të trashëgimisë kulturore të Ndre Mjedës.
“Ndre Mjeda ishte kalorës prijës i letrave shqipe, Ndre Mjeda ishte pionier i hapjes së shkollave shqipe, i gjuhës shqipe, Ndre Mjeda ishte ndër deputetët e parë të Parlamentit të parë shqiptar më 1921. Ai ishte ndoshta më eleganti në poezi, më i papërsëritshmi në sonetet e tij” u shpreh Kryetarja e Kuvendit.
Duke u ndalur tek një nga poezitë e mirënjohura të kollozit të letrave shqipe, “Andrra e Jetës”, zonja Jozefina Topalli tha se kjo poezi simbolizonte ëndrrën e jetës së kombit si dhe dashurinë e tij për kombin, për flamurin, për lirinë, për demokracinë.
“Edhe sot, Mjeda, me veprat e tij, na nderon ne të gjithëve dhe për këtë ne duam vetëm t’i shprehim mirënjohje gjeniut, gjigantit, që shkrihet me modesti dhe thjeshtësi, me gjithë jetën e tij, qoftë edhe duke jetuar këtu në Kukël. Ky qark dhe Shqipëria ka nxjerrë njerëz të mëdhenj, të jashtëzakonshëm, të cilët edhe sot përmes kontributit të tyre, e bëjnë jetën e çdo shqiptari më të bukur”, vlerësoi Kryetarja e Kuvendit.
Për kontributin në studimet mbi personalitetin e shquar të letrave shqipe Mjedës, zonja Jozefina Topalli, i dha Çmimin “Ndre Mjeda”, zotit Mentor Quku.
a.q/NOA
