Nju Jork, 4 gusht 2011, NOA – Sekretari i Përgjithshëm i OKB-së Ban Ki-Moon i dënoi mbrëmë sulmet e përgjakshme të regjimit të presidentit Bashar al Assad kundër protestuesve sirianë.
Ban Ki-Moon e cilësoi revoltuese dhe të patolerueshme dhunën e ushtruar nga regjimi për të vënë përfund protestat antiqeveritare.
Sekretari i Përgjithshëm i OKB-së deklaroi se ai do të tentojë të flasë vetë me presidentin sirian, duke theksuar se “Bota pa me sytë e saj dhe me shqetësim të thellë përkeqësimin e situatës në Siri”.
Këshilli i Sigurimit miratoi mbrëmë një deklaratë për dënimin e dhunës qeveritare në Siri.
Në deklaratën e KS-it dënohet shkelja e gjerë e të drejtave të njeriut dhe përdorimi i dhunës ndaj civilëve nga autoritetet qeveritare si dhe i bëhet thirrje Damaskut të ndalë represionin ndaj protestuesve.
Ndërkohë që protestuesve u bëhet thirrje të përmbahen ndaj sulmeve në godinat qeveritare.
Ndërkohë sot presidenti al Assad lëshoi një dekret ku autorizohet vendosja e sistemit shumëpartiak në Sirinë e përgjakur muajt e fundit.
Lajmin e bëri publik agjencia siriane Sana, e cila shpjegon se qeveria siriane kishte adaptuar në fund të muajit korrik një ligj për lejimin e sistemit shumëpartiak.
Me dekretin e presidentit sistemi zbatohet menjëherë pa patur nevojën e votimit në parlament.
Çelja e dritës jeshile për sistemin shumëpartiak në Siri shënon edhe fundin e sistemit monist në Siri monopol i partisë Baath.
Kjo është edhe pika kryesore e kërkesave drejtuar qeverisë së Damaskut nga ana e opozitës siriane dhe komunitetit ndërkombëtar.
mit/NOA
