Bari, 5 gusht 2011, NOA- Presidenti i vendit Bamir Topi gjatë vizitës së bërë në Itali së bashku me Zonjën e Parë, Teuta Topi dhe delegacionin zyrtar shqiptar u pritën sot nga Kryetari i Bashkisë së Barit, Mikele Emiliano.
Krahas tyre delegacioni shqiptar u prit edhe nga autoritetet e tjera të larta të pushtetit vendor, nga personalitete të politikës, sipërmarrjes dhe kulturës së këtij qyteti bregdetar si dhe nga shumë qytetarë, mes të cilëve numëroheshin me qindra bashkatdhetarë.
Në takimin e zhvilluar me Kryebashkiakun Emiliano dhe anëtarët e Këshillit Bashkiak të Barit, Presidenti Topi i kushtoi një rëndësi të veçantë faktit se një ndër pikat kryesore të lidhjeve historike të Shqipërisë me Italinë është pikërisht qyteti i Barit dhe Rajoni i Puljas ku është konsoliduar një marrëdhënie e fortë tradicionale miqësie mes dy popujve, e cila kapërcen çdo kufi e paragjykim.
Presidenti Topi bëri një vlerësim të veçantë për bashkësinë shqiptare që jeton në këtë qytet, e cila sipas tij ka dëshmuar vlerat më të larta qytetare, duke u integruar me dinjitet e korrektësi në fusha të ndryshme të jetës dhe veprimtarisë shoqërore të këtij rajoni. Presidenti Topi theksoi se “Ky integrim nuk do të kishte qenë i mundur pa mikpritjen dhe bujarinë e vetë qytetarëve italianë si dhe pa mbështetjen e vazhdueshme të autoriteteve italiane, të cilët iu gjendën pranë shqiptarëve në ditë të vështira të jetës së tyre, duke dëshmuar edhe një herë lidhjen e fortë tradicionale që ekziston mes dy vendeve dhe popujve tanë.”
Më tej, në Sallën e Këshillit Komunal të Barit, Presidenti i Republikës nderoi Komunën e Barit me “Medaljen e Mirënjohjes” me motivacionin: “Me mirënjohje të thellë Komunës së Barit dhe gjithë popullit të Rajonit të Puljas, për solidaritetin e rrallë dhe përkrahjen e pakufishme që i dhanë në momente të vështira dhe dramatike, 20 vjet më parë, mijëra qytetarëve shqiptarë që mbërritën në Portin e Barit, në kërkim të një jete më të mirë.”
a.y/NOA
