Londër, 10 gusht 2011, NOA – Pas trazirave dhe plaçkitjeve të ditëve të fundit, nata e mbrëmshme në Londër ka qenë më e qetë.
16 mijë policë zbarkuan në kryeqytetin britanik të mobilizuar për të shuar vatrat e mundshme të dhunës, që zunë fill pas vrasjes së një të riu me ngjyrë nga policia mbrëmjen e të shtunës, i cili sipas dëshmitarëve u vra pa faj pasi nuk kishte shtënë mbi policinë.
Duket se hija e rëndë e policëve që pushtuan rrugët e kryeqytetit pasoi një natë më të qetë se të tjerat, ku edhe pub-et u mbyllën herët, ndërsa rrugët në kryeqytet ishin të shfryra nga trafiku i përditshëm.
Vënia në gatishmëri e trupave britanike në kryeqytet u kërkua nga kryeministri britanik David Cameron, i cili ndërpreu pushimet e tij në Toskana të Italisë për t’u kthyer me urgjencë në Londër për shkak të trazirave.
Aksionet vandale në Londër shkaktuan një viktimë, pasi 26-vjeçari i plagosur rëndë në lagjen Croydon të Londrës ndërroi jetë në spitalin e qytetit të martën.
Por, ndërsa Londra ra në qetësi, trazirat u zhvendosën në qytetet Manchester, Birmingham, West Bromwich, Wolverhampton, Nottingham e Liverpool.
Huliganë dhe hajdutë nisën një aksion shkatërrimi të vitrinave dhe plaçkitje të dyqaneve të modës, e atyre të pajisjeve elektrike.
Sipas policisë dhuna e regjistruar në qytet është e më e paprecedenta në këto 30 vitet e fundit.
Në Manchester pas grabitjeve, dhunës, zjarrvënieve janë arrestuar 47 persona.
Ndërsa në Liverpool një grup të rinjsh sulmoi komisariatin lokal të policisë duke hedhur bomba.
Policia e qytetit West Midlands në Anglinë qendrore bëri me dije se janë arrestuar të paktën 80 persona, si pjesëmarrës në aktet vandale në qytetet e Birminghamit, West Bromwich dhe Wolverhampton.
Kryeministri Cameron ka thirrur një mbledhje urgjente të krerëve politikë lokalë të enjten në mëngjes që pritet të jetë e ashpër.
mit/NOA
