Korçë, 11 gusht 2011, NOA – E ftuar në festën e birrës, e cila mbahet sot në qytetin e Korçës, ambasadorja gjermane në Shqipëri Carola Müller-Holtkemper ka gjetur hapësirën edhe për pak politikë.
Në një deklaratë për mediat lokale diplomatia gjermane u ka bërë sot thirrje palëve në politikën shqiptare të bashkohen dhe të gjejnë konsesusin për reformat që duhen realizuar në vendin tonë.
“Akoma nuk kemi raportin e OSBE-së, ndaj për mua është e vështirë që të konstatoj vullnetin e zgjedhësve shqiptarë. Është kaluar nga numri i plotë, në një të pjesshëm, dhe më tej ka ardhur një rinumërim i votave. Është e nevojshme të kemi një Kod të ri Zgjedhor. Ripërcjell edhe njëherë, të njëjtin mesazh ndaj forcave politike, të cilat duhet të kenë më tepër bashkëpunim”, u shpreh ajo. Ndërkohë, e pyetur se sa larg është Shqipëria nga Bashkimi Evropian, pas këtyre zgjedhjeve, ambasadorja i është përgjigjur se distanca gjeografike nuk ka ndryshuar
Duke kërkuar që Shqipëria të ecë para me reformat, Holtkemper u pyet dhe për vlerësimin e zgjedhjeve lokale të 8 Majit. Ambasadorja u shpreh se ende nuk ka në duar asnjë raport të OSBE për zgjedhjet lokale shqiptare.
a.q/NOA
