Tiranë, 11 gusht 2011, NOA/Irma Toptani – Vetëm një ditë pasi kryeministri Berisha i bëri me dije opozitës se Kushtetuta nuk është statut partie, dhe as paketë karrigesh, edhe aleati më i ngushtë i qeverisë, Lëvizja Socialiste për Integrim e ka përforcuar reagimin e saj kundër ndryshimeve në kushtetutë duke deklaruar prerë se refuzon ftesën e PS-së për bashkëpunim në këtë pikë.
Sekretari i Përgjithshëm i LSI-së Luan Rama duke i kthyer përgjigje eksponentëve të PS-së, deklaroi se LSI nuk do të bashkëpunojë me opozitën për ndryshimet kushtetuese, apo thënë më saktë për kërkesën e ardhshme të opozitës për ndryshimin e mënyrës së zgjedhjes së Presidentit të Republikës.
Luan Rama tha se LSI-ja është kundër ndryshimeve kushtetuese pasi sipas saj Kushtetuta nuk mund të ndryshojë sa herë që ndryshon mendje Kryetari i Partisë Socialiste Edi Rama.
