Tiranë, 12 gusht 2011, NOA - Kryetarja e Kuvendit, Jozefina Topalli shpreh ngushëllimet më të thella për ndarjen e parakohshme nga jeta të deputetit Gëzim Dibra. "Me dhimbje të madhe dhe hidhërim të thellë mësova për ndarjen e parakohshme nga jeta të deputetit Gëzim Dibra. Deputeti Gëzim Dibra ishte një deputet fisnik, me zemër të madhe dhe integritet të lartë. Si përfaqësues i Shkodrës ai punoi me sens të madh përgjegjësie dhe ndershmërie. Ai ishte i dashur për të gjithë. Në këto momente të vështira për nënën, bashkëshorten, vajzën e vogël 10 vjeçare, familjen dhe miqtë, dua të shpreh ngushëllimet më të sinqerta për humbjen e njeriut të dashur”, thuhet në deklaratën zyrtare të publikuar nga zyra e shtypit. “Kuvendi i Shqipërisë ka humbur një deputet që dallonte për korrektësinë dhe angazhimin serioz në detyrën e rëndësishme. Të gjithë ne, kemi humbur kolegun e veçantë dhe mikun e mirë. Lutemi Zotit që shpirti i tij të prehet në paqe!", përfundon kryetarja e kuvendit mesazhin e saj të ngushëllimit.
Deputeti Gëzim Dibra ka ndërruar jetën sot pas një sëmundje të rëndë.
a.q/NOA
