Tepelenë, 17 gusht 2011, NOA – Në vijim të hetimit të autorëve të zjarreve që po përpijnë hektarë të tërë në mbarë vendin, një 40-vjeçar nga Tepelena është arrestuar nën akuzën e zjarrvënies me dashje të kullotës për rigjenerimin e saj.
Blutë e Tepelenës prangosën 40-vjeçarin Alin Pota, lindur dhe banues në Tepelenë pasi ai rreth orës 10.00 të paradites së 16 gushtit i vuri zjarrin kullotës së marrë me qera në vendin e quajtur Driza, pranë fshatit Veliqot të rrethit Tepelenë.
Sipas policisë falë erës së fortë zjarri i ka dalë nga kontrolli duke u përhapur në një sipërfaqe të madhe e duke djegur disa hektarë kullotë dhe disa pemë frutore.
Zjarri është vënë nën kontroll me ndërhyrjen e policisë dhe banorëve të zonës, ndërsa Alin Pota është nën akuzë për shkatërrim të pronës me zjarr.
mit/NOA
