Duke nisur nga e premtja 16 shtator, “Zonë e Lirë”, rikthehet në Tv Klan. Gazetari Arian Çani ka rikthyer kështu bashkëpunimin me Televizionin Kombëtar Klan.
Që nga e premtja e tretë e shtatorit, kur nis sezoni i ri i “Zonë e Lirë”, Arian Çani ju fton në shoqërinë e talk show-t më argëtues në vend, raporton gazeta “Koha Jonë”.
Me të ftuar të shumtë pritet të nisë puntata e 304-t e talk show “Zonë e Lirë”, tani e tutje vetëm në Tv Klan.
Me shoqërinë e Arian Çanit, regjinë e përhershme të Ledios dhe sfondin muzikor të Dj Çerrit, shikuesit e Tv Klan në këtë tetëvjetor që sapo mbushi “Zonë e Lirë”, do të mund të shijojnë programin aq shumë të simpatizuar nga ju, duke parë një format që ashtu si ka emrin, ashtu dhe në të vërtetë është, i lirë, për të thënë gjithçka, pa censurë.
“Zonë e Lirë” hyn në vitin e nëntë të transmetimit, që nga sezonet e para kur ai ndiqej përmes televizionit kombëtar Arbëria.
Më tej, “Zonë e Lirë” shkoi në televizionin kombëtar Klan për disa vjet dhe për tre sezone të tjera u ndoq në kanalin Vizion Plus.
