Prishtinë, 25 gusht 2011, NOA- Në mbledhjen e radhës së qeverisë Kryeministri i Kosovës Hashim Thaçi u shpreh se, për Qeverinë dhe për institucionet e Kosovës, sundimi i rendit dhe ligjit kanë qenë, janë dhe do të mbesin prioritetet kryesore.
“Qeveria e Republikës së Kosovës do të vazhdojë të mbështesë fuqishëm të gjitha institucionet e sigurisë në vend. Janë inkurajuese deklarimet nga faktorët ndërkombëtar për qëndrimin unik në vendosjen e rendit dhe ligjit në veri si dhe për t’u përballur me strukturat ilegale dhe kriminale që funksionojnë në këtë pjesë të vendit”, deklaroi Thaçi.
Më tej ai shtoi se njohjet e reja që po i vijnë Kosovës janë treguesit më të mirë se strategjia e institucioneve për lobim po jep rezultatet e saja.
Ndërkaq në këtë linjë, zëvendëskryeministri Behxhet Pacolli theksoi se në ditët në vijim ai do të vazhdojë lobimin duke u ndalur te shtetet afrikane dhe do të vazhdojë me një qëndrim në Nju Jork ku do të takojë përfaqësuesit e vendeve të Amerikës Jugore.
Ndër të tjera Kryeministri Thaçi falënderoi për angazhimin e zëvendëskryeministrit Sllobodan Petroviç për punën e bërë me qytetarët e Prilluzhës.
Në këtë kuadër ai tha se, “Qeveria e Kosovës do të mbetet e përkushtuar të vazhdojë me investimet për të mirën e të gjithë njerëzve, pa dallime etnike, në gjithë territorin e vendit tonë. Edhe siguria e qytetarëve tanë do të jetë prioritet i yni i vazhdueshëm”.
a.y/NOA
