Prishtinë, 27 gusht 2011, NOA- Qeveria e Kosovës, nëpërmjet një deklarate të Ministrit të Jashtëm Enver Hoxhaj, ka shprehur se njeh zyrtarisht Këshillin Kombëtar të Libisë, si autoritetin e vetëm qeverisës.
Në emër të Qeverisë së Republikës së Kosovës, Ministri i Punëve të Jashtme i Republikës së Kosovës, Enver Hoxhaj, i ka dërguar një letër Kryetarit të Këshillit Kombëtar të Libisë, Mahmoud Jibril, përmes së cilës e ka njoftuar me vendimin që Republika e Kosovës njeh zyrtarisht Këshillin Kombëtar të Libisë, si autoritetin e vetëm qeverisës në Libi.
Letra e ministrit Hoxhaj dërguar Kryetarit të Këshillit Kombëtar të Libisë:
H.E. Mr. Mahmoud Jibril
Chairman and Head of International Affairs
National Council of Libya
Ekselencë,
Në emër të Qeverisë së Republikës së Kosovës, jam i lumtur t’ju informoj që Republika e Kosovës njeh zyrtarisht Këshillin Kombëtar të Libisë, si autoritetin e vetëm qeverisës në Libi.
Pas një udhëtimi të gjatë dhe përpjekjeve të shumta të popullit të Libisë, njohja e qeverisë tuaj, si organi i vetëm përfaqësues legjitim i popullit të Libisë, buron nga besimi dhe mirëkuptimi jonë se kjo Qeveri mund të udhëheq procesin për të ndërtuar një Libi të bashkuar, të lirë dhe demokratike, e bazuar në sundim të ligjit, në përputhje me standarde të larta të drejtave dhe lirive të njeriut.
Ne jemi të bindur se siguria e të gjithë libianëve do të garantohet, në mënyrë që të hapet një kapitull i ri i lirisë së madhe dhe drejtësisë dhe se ky moment i zotimit të shndërrohet në përparim të qëndrueshëm.
Unë jam i bindur se lidhjet miqësore dhe bashkëpunimi në mes të Republikës së Kosovës dhe Libisë do të thellohen në vitet që vijnë. Me këtë rast, shpreh propozimin e Qeverisë sime, që dy shtetet të vendosin marrëdhëniet diplomatike.
Mbesim të përkushtuar për kultivimin e marrëdhënieve të përzemërta me Ju dhe me Këshillin tuaj Kombëtar.
a.y/NOA
