Zvicër, 28 gusht, NOA - Gazeta zvicerane “Tagblatt” u ka kërkuar falje shqiptarëve, pasi në një shkrim të saj ka fajësuar kolektivisht shqiptarët për krime në Zvicër, pas rastit të prerjes me thikë në fyt të një zvicerani nga dy të rinj kosovarë.
Gazeta në shkrimin e publikuar një ditë pas krimit të ndodhur kishte shkruar titullin në shumës “Kosovarët presin zviceranët në fyt”. Po ashtu edhe media të tjera zvicerane kanë përdorur frazat në shumës si për shqiptarët ashtu edhe komunitetin shqiptar nga Kosova që është dominues.
Pas reagimit të shoqatave që merren me të drejtat e emigrantëve dhe klubeve të ndryshme të emigrantëve shqiptarë në Zvicër. Një pjesë e partive politike zvicerane kanë kërkuar që të ndërpritet fushata mediale kundër shqiptarëve nga Kosova dhe të respektohet si komunitet, ndërsa një pjesë e partive nacionaliste kanë kërkuar që të vazhdojnë qasjet kritike dhe nënçmuese ndaj shqiptarëve dhe të kërkohet kthimi i tyre në vendlindjen e tyre.
NOA/INA
