Tiranë, 3 shtator 2011, NOA/ Arjola Ymeraj- Dy votat më tepër të kandidatit socialist Balë Vuksani, kanë bërë që Partia Demokratike të kundërshtojë rezultatin e zgjedhjeve të zhvilluara në komunën Shalë.
Nëpërmjet një kërkese për pavlefshmëri nga ana e Partisë Demokratike, Komisioni Qendror i Zgjedhjeve nuk ka arritur kuorumin e nevojshëm, duke e rrëzuar kërkesën e palës demokrate me 4 vota pro dhe 2 kundër, nga 5 që nevojiteshin.
Në kërkesën e saj, Partia Demokratike synonte që të sillte 16 karta identiteti të 16 banorëve si provë, ku sipas demokratëve pretendohet se ata nuk janë lejuar që të votojnë.
Sakaq më tej u kërkua pavlefshmëria e zgjedhjeve në komunën Shalë, sepse thuhej se në votimin e fundit kishin votuar dy banorë që nuk ishin në listën e zgjedhësve, por që e kanë fituar këtë të drejtë me vendim gjykate.
Nëpërmjet kërkesës së demokratëve thuhet se këto dy vota janë vendimtare për rezultatin, por që ky argument u kundërshtua nga komisionerët duke thënë se votimi i tyre është bërë ligjërisht.
Pas kësaj nuk dihet cili është hapi i radhës i demokratëve, ndërsa mendohet se PD do e kërkojë të drejtën në Kolegjin Zgjedhor.
a.y/NOA
